Salientan as grandes vantaxes de aforro da computación na nube para as administracións pequenas
venres, 23 de novembro do 2012
Apostar na Administración Electrónica
pola nube aforraría máis de 340 millóns de euros a España. Esta é
unha das conclusións ás que chega a empresa TangramBPM
nuns recentes estudos sobre casos concretos de implantación
desta tecnoloxía en concellos e outras entidades públicas. Para
entendérmonos, a computación na nube na eAdministración sería en
boa medida unha alternativa á habilitación de Centros de
Procesamentos de Datos, CPD, infraestruturas propias das institucións
destinadas, entre outras cousas, a dar acubillo a toda a
documentación que xeran elas mesmas e os seus departamentos. Pois
ben, segundo sinala a dita empresa, a computación na nube (levar os
datos á Rede) permitiría importantes aforros fronte ao devandito
sistema tradicional (18.000 euros fronte a 60.000, din).
E engaden: “Dentro do marco de
austeridade e contención do gasto que caracteriza as contas de
calquera Administración ou organismo público para o presente
exercicio, a nube convértese na táboa de salvación para aqueles
concellos ou universidades que non contan arestora con
grandes orzamentos e que, porén, están na obriga de cumprir as
esixencias lexislativas, segundo as cales a partir de 2014
obrigarase a que os sistemas da eAdministración atendan normas
estritas de interoperabilidade, de seguridade e de conservación dos
datos electrónicos”. Segundo sinala a dita empresa, o control
de custes faise aínda máis significativo en concellos miúdos, de
menos de 20.000 habitantes, e en universidades. Por exemplo,
informan, no Concello de Catarroja, en Valencia, onde se acadou un
aforro social do 80% en relación cos trámites xestionados de xeito
electrónico. Nestas núcleos administrativos de escaso orzamento,
faise especialmente importante contar cunha tecnoloxía, a nube, que
non implique dispoñer de 40 informáticos que xestionen a unidade de
sistemas, porque todo o mantemento está en liña, e é xestionado
pola empresa que ofrece o servizo.