Sage abre na Coruña unha xira estatal de presentación de novos servizos

José María Raventós, director de Contas de Sage

Sage, empresa centrada en solucións e servizos tecnolóxicos de xestión, vai pór en marcha un itinerario de presentacións e obradoiros por toda a xeografía estatal. Dáse a circunstancia de que o punto de partida elixido para o roadshow é a cidade da Coruña, o vindeiro 18 de marzo. A cita, na que Sage informará aos despachos profesionais locais sobre cuestións relacionadas cos cambios na Renda e outras máis ligadas aos seus produtos produtos e solucións, conta co patrocinio de Grupo Francis Lefbvre, HP, Intel, Microsoft e Ono.
No encontro, a compañía presentará a súa ferramenta Sage One Despachos, unha solución que “dá resposta ás necesidades que un asesor ou un despacho ten á hora de optimizar a relación que mantén cos seus clientes, utilizando Internet como a canle habitual de relación no seu traballo diario”, informa a compañía, que tamén salienta o potencial do dito recurso para facer que os profesionais-usuarios interactúen entre eles e poidan comprobar, nun segundo, o estado dos negocios dos clientes. Cousas como orzamentos e facturas enviadas, as vendas realizadas, a información bancaria e toda aquela información necesaria para poder traballar “de maneira rápida e segura”.
O evento na Coruña arrincará ás 16:30 horas do próximo 18 de marzo no Hotel Meliá María Pita (Av. Pedro Barrié da Maza, 1). A cita, ademais de contar con Patricia Cardador, xefa da Oficina Técnica de Inspección en Galicia, disporá da presenza de Ana Isabel Martínez, coordinadora de Produto de Sage, e Joan Celeiro, xefe de Produto de Sage, que explicarán en detalle como funcionan todas as ferramentas da compañía, dirixidas en boa medida “a facer máis doada esta campaña da Renda e Sociedades a despachos e asesorías de Galicia”, engade a firma.