SIGRE divulga a figura da farmacia respectuosa co medio ambiente cunha infografía interactiva
luns, 3 de xuño do 2019
Xuntar forzas contra o cambio climático e buscar respostas,
tamén, na innovación, na sustentabilidade e no coñecemento. Este é un dos
grandes obxectivos de SIGRE, unha entidade farmacéutico-medioambiental que
aposta pola reciclaxe como fórmula axeitada e eficaz para contrarrestar a
destrución do planeta, poñendo o foco nos produtos que lle tocan de preto: os
relacionados coa saúde, a medicina e os coidados.
Esta mañá os responsábeis da entidade estiveron na sede do Colexio Oficial de
Farmacéuticos da Provincia da Coruña para visualizar as vantaxes dun correcto
tratamento do material farmacéutico desbotado e, tamén para mostrar os
resultados ambientais alcanzados por SIGRE en Galicia. Neste
punto, a entidade salientou que as galegas e galegos fomos quen de reciclar, o
ano pasado, preto de 322.500 quilos dos devanditos refugallos.
- A ecoFARMACIA é unha infografía interactiva publicada por SIGRE para dar conta de como coidan do medio ambiente dende as farmacias
O encontro contou coa presenza da conselleira de Medio Ambiente, Territorio e
Vivenda da Xunta de Galicia, Ángeles Vázquez, o presidente do Colexio Oficial
de Farmacéuticos da Provincia da Coruña, Héctor Castro, e o director xeral de
SIGRE, Juan Carlos Mampaso, quen tras o repaso da situación da reciclaxe de
medicamentos en Galicia quixo salientar a creación dun micrositio web no que recollen 77 boas
prácticas para coidar do medio ambiente dende a farmacia a través dunha
atractiva infografía interactiva.
- Juan Carlos Mampaso, director xeral de SIGRE, asegurou que Galicia é «a cuarta comunidade autónoma con habitantes que contribúen en maior medida á correcta reciclaxe» de envases e restos de medicamentos
Salientaron que a nosa terra atópase entre as comunidades con meirande taxa de
reciclaxe en envases de medicamentos a través dos puntos SIGRE, en boa medida
polo feito de que o programa piloto desta iniciativa desenvolveuse na provincia
de Ourense, de xeito que o noso territorio ten carácter pioneiro. Para facernos
unha idea, durante o pasado ano rexistramos unha recollida media de 120 gramos
de recipientes baleiros ou con restos de produtos por habitante, 15 puntos por
riba da media española.
Na sesión cos medios, Ángeles Vázquez explicou estes bos resultados son «a
mellor mostra» para afirmar que o traballo que se está a levar a cabo con todos
os axentes do sector farmacéutico (farmacias, colexios oficiais de
farmacéuticos, distribución, laboratorios, Asociación Española de Medicamentos
Xenéricos...) é «o correcto para acadar os obxectivos principais e compartidos
por todos, como é afianzar nos fogares o hábito de reciclar os medicamentos e
de usalos con responsabilidade, para non xerar residuos innecesarios».