Ramoncín quere cobrarlle 6000 euros a un webmaster por comentarios de usuarios deixados no seu foro

O pasado 19 de xuño, o webmaster de alasbarricadas.org tivo que presentarse ante o xulgado nº44 de Madrid para responder por uns comentarios deixados polos usuarios do foro da páxina.
O que nun comezo ía ser un mero trámite preparatorio para o xuízo, puxo de manifesto o sentido que iría adoptando o proceso, ó impedirlles, segundo afirman os denunciados, “empregar tódolos medios posibles para a súa defensa incluso por parte da xuíza, que rexeitaba toda proba ou testemuño que axudase a aclarar o proceso así como admitindo incondicionalmente toda proba proposta pola avogada de Ramoncín”.
Segundo parece, o webmaster de merodeando é, a tal hora, “cabeza de turco” neste caso, e está a pagar inxustamente por comentarios alleos á súa persoa deixados na páxina que administra por usuarios “que os denunciantes nin sequera se preocuparon de buscar”, aseguran.
Os afectados afirman que non se trata dun caso aillado xa que segue as mesmas pautas que a recente demanda contra merodeando.com e a situación din, “é preocupante ata o punto de que as sentencias que saian desta liña de actuación poderían sentar precedentes, e en consecuencia, a SGAE podería pechar ou bloquear páxinas por comentarios de usuarios, visitantes anónimos...” .
Na actualidade, o webmaster de merodeando.com atópase nun proceso longo e difícil que non só lle afectará á páxina web que administra senón que será, probablemente, o futuro que lles agarda a moitos outros sitios web ós que se pode acceder libremente e exercer un dos dereitos máis fundamentais dun estado democrático, o da liberdade de expresión.