R leva a súa fibra ultrarrápida a 400 fogares e empresas de Pobra de Trives

A operadora galega R prosegue cos seus traballos de espallamento de redes ultrarrápidas (redes de Internet a través de fibra óptica) nos nosos concellos. Nesta recta final de 2019 o novo servizo de FTTH (Fiber To The Home) da compañía de cable estréase en Pobra de Trives, en Ourense. O fornecemento desta infraestrutura implicará a dispoñibilidade de accesos de nova xeración (con servizos avanzados de teléfono, Internet de alta velocidade con 500 Mbps simétricos e televisión dixital multicanle de R) para 400 fogares e empresas do núcleo do municipio.
Os traballos de acondicionamento urbano e subministro de cable, novamente, tentaron tirar o máximo proveito das infraestruturas municipais previamente existentes no concello ourensán, segundo informa R, engadindo que a achega de fibra no devandito municipio abéiranse ao Plan PEBA-Avanza do Ministerio de Economía e Empresa, do que R foi adxudicataria en 2016 para despregar FTTH (fibra até o edificio) nas chamadas “zonas brancas”, é dicir, as que nunca dispuxeran de accesos de alta velocidade até este momento. Do dito plan forman parte os despregues de Pobra de Trives e de Petín (os dous en Ourense) e máis os recentemente levados a cabo en Lugo (Monterroso, Lourenzá, Palas de Rei ou Barreiros).
Xunto co das provincias de Lugo e Ourense, o operador galego conseguiu tamén a adxudicación doutros dous proxectos; un, para a provincia de Pontevedra, onde chegou a localidades coma Cuntis, Combarro, Meaño, Pontecaldelas, Ribadumia e Tomiño; e outro para A Coruña, provincia na que despregou rede en Abegondo, Cerceda, Muros, Camariñas, Curtis, Ortigueira ou Porto do Son.
En total, os tres proxectos supoñen un investimento de preto de 8 millóns de euros, dos que 4,3 son subvencionados polos fondos FEDER da Unión Europea, a través do Programa de Extensión da Banda Larga de Nova Xeración (PEBA-Plan Avanza) do Ministerio de Economía e Empresa. Nas provincias de Lugo e Ourense o investimento total supera os 785.000 euros, dos cales máis de 430.000 proceden dos fondos europeos.