R leva a fibra óptica á zona industrial de Mos
venres, 9 de xaneiro do 2015
A
Asociación
de Empresarios de Mos (AEMOS)
vén de anunciar que os membros do tecido empresarial do concello
pontevedrés contarán a partir de agora coas vantaxes da fibra
óptica a través da operadora de telefonía R. Cómpre sinalar que o
acordo entre José Mañas (presidente de AEMOS) e Arturo Dopico
(Conselleiro Delegado de R) foi resultado de oito meses de encontros
e entrevistas con responsábeis da
operadora galega,
onde se trataron temas como o déficit nos sistemas de
telecomunicación
que presentan as zonas industriais de Mos con respecto á tipoloxía
e grande volume de empresas asentadas no lugar. Como resultado
beneficiaranse máis de 300 empresas do concello situadas en:
Rebullón, Puxeiros, Portela, Montefaquiña e o PEMOS da Veigadaña.
Deste
xeito, as ditas empresas contarán con fibra de alta calidade, 100
Mbps de baixada e 10 de suba.
Segundo
informa a Asociación de Empresarios, “con este pacto entre a
operadora R e AEMOS péchase unha problemática que xa duraba anos,
un longo tempo de denuncias e peticións a distintas operadoras,
constantes e continuos fallos de conectividade por mor dunha
infraestrutura obsoleta”.
A
xeito de curiosidade, sinalar que Mos figura no 4º posto da listaxe
de maior facturación da provincia de Pontevedra. O progresivo
asentamento de empresas que experimentou o concello ao longo das dúas
últimas décadas, non levou parello a creación de servizos á
altura das necesidades empresariais neste eido, “o que minguou a
súa competitividade con respecto a empresas asentadas noutras
demarcacións”, engade a asociación.