R constata que as plataformas de streaming chegaron ter subas do 90% no confinamento
luns, 15 de febreiro do 2021
A
operadora R
achegou este luns 15 un balance sobre a actividade da comunidade de
usuarias e usuarios dos seus servizos durante a pandemia, poñendo o
foco nos hábitos xerados e impulsados pola mesma. Segundo fai saber,
este ano de crise sanitaria influíu, e moito, nos hábitos de
consumo de servizos de telecomunicación da cidadanía galega: “En
2020 as persoas pasaron máis tempo ca nunca nos seus fogares, xa
sexa polo confinamento, o peche de centros educativos, o teletraballo
ou as distintas fases de restrición á mobilidade”, sinala R no
comunicando, engadindo que todos estes feitos converteron a
televisión “na ferramenta de lecer e entretemento por excelencia”.
En termos concretos, até 70 % dos seus clientes/as consumiron
servizos de televisión avanzados este ano.
Ademais,
o tempo que empregaron para visualizar contidos pasou de menos de 3
horas na etapa previa á pandemia a máis de 5 a partir de marzo do
ano pasado.
En
canto aos contidos, os dedicados ás/aos máis pequenas/os e aqueles
que se desfrutan baixo demanda son os que máis creceron, estes
últimos ata case o 60 %.
R
lembra que a demanda foi liderada polas plataformas dixitais de
pagamento, “con incrementos do tráfico que chegaron a rozar o 90 %
con respecto á etapa previa ao confinamento”.
A
operadora tamén fai saber que é presumíbel que estes e outros
datos se repitan en 2020 ou mesmo vaian a máis, “xa que as
primeiras cifras de 2021 mostran que o tráfico medio das plataformas
dixitais de pagamento en xaneiro está case nun 35 % por riba do
rexistrado no conxunto de 2020”.
R
tamén constatou un aumento dos tráficos en todos os servizos. Así,
Facebook tamén destaca entre os servizos preferidos polas galegas e
os galegos. Durante o confinamento, o seu tráfico diario medrou ata
un 46 %, “acadando picos superiores ao 50 % no Nadal”. Ademais os
primeiros datos de 2021 apuntan a un mantemento desta boa tendencia,
“xa que no primeiro mes do ano, o tráfico da dita rede social
chegou a ser ata un 36 % superior ao do conxunto de 2020”.
En
canto á telefonía, o uso tanto da móbil como da fixa duplicouse,
cun incremento non só do número de chamadas, senón tamén da súa
duración. Destaca o aumento significativo do 300 % no uso de
WhatsApp e, especialmente, do seu servizo de vídeo-chamadas.
R
engade que as necesidades de conectividade tamén supuxeron un
aumento do tráfico Internet, que experimentou novos picos de uso
pola mañá relacionados teletraballo e a asistencia a clases de
xeito telemático. E así, o pasado mes decembro rexistrouse o maior
pico de acceso de banda larga da historia, aumento do 82 % con
respecto ao período anterior ao confinamento.