R conecta 462 novos inmóbeis de Mos á súa fibra óptica
martes, 15 de marzo do 2022
R
fixo balance dos seus traballos recentes en Mos para dotar a máis de
inmóbeis do concello de fibra óptica avanzada. Segundo fixo saber,
un total de 462 novos fogares e empresas dos núcleos de Casal,
Gándara, Espaín, Balteiro, Laxe, Agueiro, Rebullón, Cerdedelo e
Regomil, en Mos (Pontevedra), xa poden dispor de accesos
ultrarrápidos a internet de ata 10 Gbps simétricos e gozar, polo
tanto, de servizos telecomunicacións de vangarda. Estas unidades
inmobiliarias están xa conectadas grazas á nova despregadura
rematada recentemente pola operadora no concello. O resultado son,
como dixemos, máis de catrocentos sesenta fogares e negocios nos
devanditos núcleos.
O
operador galego lembra que xa acometera en meses anteriores en Mos
outras despregaduras das súas redes nos núcleos de Atín, Casal,
Campo de Eiro, Rebullón, Gándara, Zapateira, Laxe, Igrexa e
Balteiro, Sobrado, Bosende, Cotiño, e en total conectáranse ás
redes avanzadas de R unhas 1.125 vivendas e empresas deste concello
da Ría de Vigo. Cando rematen as despregaduras enmarcadas no vixente
Plan Avanza no que R traballa arestora, 2.784 fogares e negocios
teranse unido á rede de fibra da operadora no concello de Mos, pois
aos inmóbeis incorporados na contorna do plan do Ministerio haberá
que sumarlles os conectados a través doutros traballos de
desenvolvemento de rede que R vén realizando na zona dende hai anos.
Este
e outros traballos de cobertura na provincia de Pontevedra forman
parte dun dos tres proxectos do Plan PEBA-Avanza do Ministerio de
Asuntos Económicos e Transformación Dixital dos que R resultou
adxudicataria en 2018 para despregar a tecnoloxía FTTH en 512
núcleos de Galicia que non dispuñan de alta velocidade ata o
momento (“zonas brancas”).
No
desenvolvemento do tres plans investirase un total de 10M€, dos
cales preto de 8M€ son subvencionados polos fondos FEDER da Unión
Europea. En concreto, as despregaduras de Mos enmárcanse no proxecto
destinado á extensión de redes de nova xeración en 196 núcleos de
municipios do sudoeste de Galicia (Pontevedra). Os traballos nestas
zonas suporán un investimento total de 3,75M€.
A
día de hoxe, só no marco do Plan Avanza, R chegou por primeira vez
coas súas redes de nova xeración a núcleos de poboación das catro
provincias galegas que nunca dispuxeran de alta velocidade nos
concellos do Rosal, Monterroso, Palas de Rei, Boqueixón, Porto do
Son, Curtis, Cuntis, Meaño, Mos, Pobra de Trives, Petín, Barreiros,
Lourenzá, Ortigueira, Cariño, Camariñas, Muros, Cerceda, Antas de
Ulla, Moraña, Guitiriz, Tomiño, Abegondo, Ribadumia, Combarro,
Muxía, Valga, Vilaboa e Ponte Caldelas.