Quipup, unha nova tenda en liña de tecnoloxía que botará a andar dende Vigo
venres, 23 de outubro do 2015
Nas vendas en liña trunfan as viaxes, os billetes para
espectáculos e, como non, os produtos de tecnoloxía, e para achegar ao público
unha boa oferta de trebellos electrónicos a prezos atractivos chegará o vindeiro mércores dende
Vigo unha nova tenda en liña, Quipup,
que leva varias semanas dándose a coñecer a través dun vídeo no que convidan a transeúntes a pronunciar o nome da
súa marca (Kuipap? Kipap? Kuipup? Kipup?) e unha promoción na que podemos inscribirnos durante un mes para participar no
sorteo un robot BB-8, que será
un dos xoguetes tecnolóxicos estrela no vindeiro Nadal.
Precisamente sobre o Nadal a propia tenda en liña adianta que dende o 12 de
decembro terán un 20% de desconto en todas as súas compras, rebaixa superior ao
17,36% que temos nos famosos días sen IVE
que celebran distintas cadeas de electrónica de consumo, polo que será unha
grande oportunidade para facerse con certos produtos como agasallo para o Nadal.
Quipup ofrecerá unha interesante selección de smartphones, tabletas, wearables, accesorios (fundas,
cargadores, teclados Bluetooth, baterías externas...), auriculares,
altofalantes, tarxetas de memoria, discos duros, pendrives e outros produtos
que se irán incorporando nas vindeiras semanas buscando sempre unha boa
experiencia como reza o seu lema “enjoy shopping, enjoy tech” (goza da compra,
goza da tecnoloxía). As entregas realizaranse en 24 horas, con portes de balde a partires dos 150 euros e empregando sistemas de pagamento seguros para tranquilidade dos compradores.
Detrás
deste proxecto están Sergio Costa, Rafa Lojo e José Alcañiz, profesionais
con grande experiencia en proxectos en liña, que acompañados pola súa mascota
Quippy buscan crear a mellor tenda de tecnoloxía en liña posible, segundo
podemos ver no seu blog, que é unha
fiestra aberta a esta iniciativa de comercio electrónico.
Vídeo promocional de Quipup