Queixas pola exclusión do galego do servizo DictaSMS de Vodafone
luns, 31 de xaneiro do 2011
A CiberIrmandade da Fala volve
á carga contra aqueles servizos vinculados á Sociedade do Coñecemento que
polas razóns que sexan deciden apostar polo que se podería entender como unha
sociedade do descoñecemento das culturas e da diversidade. Desta volta, é a
quenda do grupo Vodafone, que leva anos gabándose do bo funcionamento dos seus
servizos de atención e comunicación co cliente e, porén, na súa web non achega por
ningures a posibilidade de sermos informados na nosa lingua. Máis polo miúdo,
estamos a falar do seu servizo DictaSMS
(ferramenta para converter as mensaxes de voz que recibamos ou enviemos en SMS),
que arestora fica a contrapelo da lingua galega.
“Cando
un/ha galego/a quere utilizar na súa lingua o servizo DictaSMS”, cóntanos a
CiberIrmandade, “non pode facelo porque
esta empresa tan preocupada por satisfacer os seus clientes non cumpre nin co
mínimo requisito e deber que ten, que é ofrecer os seus servizos na lingua
oficial que existe onde opera, neste caso, o galego”. Con este motivo e
como vén sendo costume, a CiberIrmandade puxo en marcha unha campaña en liña
para esixirlle a Vodafone o cumprimento do seu deber como empresa senlleira que
é das telecomunicacións e da Sociedade da Información.