PuntoGal publica unha caixa de ferramentas de ciberseguridade para pemes
mércores, 2 de novembro do 2022
Froito
da súa incorporación (o ano pasado) á Global Cyber Alliance (GCA),
a organización internacional adicada a afrontar os riscos
cibernéticos e facer da Rede un lugar máis seguro, a Asociación
PuntoGal está a converterse tamén nun dos grandes referentes da
Internet galega en materia de seguridade online. De feito, a
dita incorporación situou a PuntoGal como a primeira entidade galega
en sumarse a esta alianza global, dentro da súa política de
“reforzar a seguridade do ámbito dixital”. Ao abeiro deste marco
de traballo, este novembro publicouse unha caixa de ferramentas para
mellorar a salvagarda da información e as comunicacións nas
pequenas e medianas empresas en galego, á que se pode acceder dende dominio.gal.
O
director xeral de PuntoGal, Darío Janeiro, sinalou que “esta caixa
de ferramentas, a primeira de varias que temos en proxecto, permite
ás pemes dar un primeiro paso no diagnóstico e prevención de
posíbeis problemas de seguridade, que poden dar tranquilidade aos
administradores ou sinalar a necesidade de buscar asistencia con
cuestións puntuais”.
Janeiro
engadiu que “ao longo destes meses e no ano 2023 iremos publicando
novas caixas de ferramentas sectoriais, sempre pensadas como algo
práctico, sinxelo de usar e con opcións gratuítas, e ofrecendo
protección aos dominios a través da plataforma Domain Trust, un
proxecto promovido pola GCA para facilitar o intercambio de
información sobre dominios maliciosos, unha das infraestruturas
esenciais usadas pola ciberdelincuencia."
Pola
súa banda, Brian Cute, director do programa de capacitación e
resiliencia da GCA, sinalou que “o traballo da GCA pola confianza
e a seguridade de Internet desenvólvese nunha dobre dinámica
global-local, e a nosa colaboración con PuntoGal é un exemplo
perfecto disto. Primeiro, con Domain Trust, PuntoGal levou a escala
global a protección dos dominios .gal, criados localmente. Agora,
coa caixa de ferramentas, leva aos usuarios dos seus dominios, pemes,
asociacións e administracións locais, a protección das ferramentas
ofrecidas polos nosos socios internacionais. Esta colaboración é un
modelo a seguir con outros socios con forte presencia local.”