Prohiben cautelarmente a actividade de Uber no territorio español
martes, 9 de decembro do 2014
O xuíz do Mercantil nº 2 de Madrid ordenou o cesamento
e a prohibición en todo o territorio español o sistema Uber que facilita o
contacto de usuarios e condutores para os seus desprazamentos a través de
cidades españolas (actualmente Madrid, Barcelona e Valencia). O auto acorda
medidas cautelares a petición da Asociación Madrileña do Taxi, de cara á
interposición dunha futura demanda contra Uber. O xuíz aceptou a medida por
considerar que os condutores contratados carecen de autorización administrativa
para desenvolver a actividade que pode considerarse competencia desleal.
A resolución xudicial destaca que non estamos ante un debate filosófico sobre a
liberdade de mercado, senón “unha protección cautelar baseada na legalidade
vixente”. O xuíz chega a esta conclusión porque a lei de competencia desleal
determina que cando se infrinxen as normas que son esixidas para actuar nun
mercado a infracción en si é unha acción desleal.
O auto con data de hoxe tamén oficia ás empresas de telecomunicacións e
pagamento electrónico que prohiban todo tipo de transaccións e aloxamento ás
empresa Uber.
Curiosamente o caso español de oposición a Uber non é o único do que está a
darse conta hoxe, pois coincide
coas medidas que están a emprender contra a compañía na India e en Tailandia.
No caso tailandés matizan que non prohiben directamente a actividade de Uber,
senón o uso de vehículos sen rexistrar; mentres que na India as accións contra
Uber están enmarcadas nun polémico caso de violación, no que están a estudar a
posibilidade de considerar a posibilidade de que o servizo en liña teña
responsabilidade legal no acontecido.