ProLingua anima á comunidade galega a celebrar a lingua cunha campaña masiva de videoselfies
venres, 2 de maio do 2014
Achégase o Día das Letras Galegas e a nosa
comunidade en liña móvese xa para celebralo ao grande. E ademais,
botando man das metodoloxías que precisamente ten máis a man unha
comunidade en liña. Ou sexa, campañas nas redes sociais,
iniciativas colectivas nas cada quen trae o seu gran de area e, en
definitiva, ese tipo de cousas que abranguen a participación de
aparellos tecnolóxicos que funcionan como instrumentos para levar a
cultura e as letras galegas ao futuro. ProLingua é unha das
plataformas que primeiro move ficha. E fíxoo coa campaña Mil
primaveras máis para a lingua galega, unha iniciativa que
nos convida a gravar vídeos de nós mesmos (videoselfies)
dicindo a frase Por min o galego terá mil primaveras máis. A
idea é amosar o resultado ao mundo a través da Rede.
As pezas resultantes deberán ser enviadas á conta
prolinguagalega@gmail.com
antes do 23 de maio. O froito deste traballo será pois unha
creación colectiva que amose á perfección o espírito de
vitalidade e crecemento que se lle quere dar ao galego a través da
campaña. Segundo informan dende Prolingua, “antes de rematar a
primavera florecerá unha gravación na que cada compromiso
individual dea vida a un compromiso colectivo; sumaremos forzas e
ampliaremos a rede de afectos ao redor do idioma para seguir sentindo
que a Patria da Lingua Galega terá mil primaveras máis”.
Por certo que o título da campaña fai referencia á
xa histórica frase que pronuncio o escritor Álvaro Cunqueiro na
homenaxe recibida o 25 de abril en Vigo, un recoñecemento a unha
obra e a unha vida que veu da man dos seus amigos e desenvolveuse no
Hotel Samil. Engadir que a frase “Mil primaveras máis para a
lingua galega”, que figura na lápida do autor de Xente de aquí
e de acolá, celebra estes días o seu 35 aniversario, polo que
se reforzan os motivos (que xa eran moitos) para que acompañe a
iniciativa de Prolingua.
Sinalar tamén que segundo indica Prolingua, os
videoselfies que se acheguen á iniciativa pódense gravar co
móbil a título individual ou ben constituíndose grupos específicos
para a ocasión.