Preto de 90.000 cidadáns máis da Coruña xa se poden beneficiar da e-receita
venres, 30 de outubro do 2009
A conselleira de Sanidade, Pilar Farjas Abadía, desprazouse hoxe ata a
cidade da Coruña para comprobar, de primeira man, o funcionamento da receita
electrónica na comarca, posta en marcha polo seu departamento nas últimas
semanas en varias localidades da zona, en colaboración co Colexio Oficial de
Farmacéuticos da Coruña.
Farjas Abadía, xunto coa presidente do devandito colexio profesional, Rosa
Lendoiro Otero, achegáronse ata unha farmacia da cidade herculina para
cerciorarse de que o uso da receita electrónica xa é unha realidade para os
doentes que acuden aos Centros de Saúde de Castrillón, do Ventorrillo e dos
Mallos, centros médicos nos que este servizo se puxo en funcionamento ao longo
desta semana.
Agora mesmo, ao redor de 90.000 cidadáns benefícianse xa desta medida na
comarca, un número que se irá incrementando paseniñamente a medida que se vaia
despregando o servizo nos centros de saúde da Casa do Mar, Matogrande e Monte
Alto-A Torre.
A titular de Sanidade destacou que unha vez superada a fase de pilotaxe, “este ano evolucionou o despregue de receita
electrónica a gran velocidade”, tendo xa agora 107 centros de saúde en
Galicia con conexión directa a farmacia con e-receita,
e 555 oficinas de farmacia conectadas a este novo sistema. Así, ao redor de
740.000 usuarios benefícianse desta iniciativa, o que representa unha
porcentaxe de ao redor do 26% da poboación galega.
Pilar Farjas anunciou, tamén, o arranque en próximas datas da receita
electrónica noutras áreas de Galicia, como os centros de saúde de Vigo de Casco
Vello, A Doblada, Rúa Cuba, Colmeiro e Nicolás Peña; os centros de saúde de
Lugo de O Incio, Paradela, Samos, Sarria, Láncara e Triacastela; e os centros
de saúde de Ourense de Ribadavia, Allariz, A Cuña e Novoa Santos.
Deste xeito, e continuando con esta liña de expansión, está previsto que a
Consellería de Sanidade, en colaboración cos Colexios Oficiais de Farmacéuticos
de Galicia, remate o ano con 167 centros de Atención Primaria integrados neste
proxecto, co que se dará cobertura nesas datas a unha poboación de máis de
1.200.000 cidadáns nas catro provincias galegas, o que supón máis do 43 por
cento da poboación con acceso á e-receita.