Presto Vivace revoluciona o ensino musical coa plataforma Presto ON
martes, 29 de decembro do 2020
Presto
Vivace, escola de música coruñesa e Conservatorio Oficial de Música
Moderna, pon en marcha dous proxectos de ensino pioneiros que, en
palabras do propio centro docente, permitirán chegar a todos os
fogares grazas ás ferramentas dixitais, “axudando en todo momento
aos alumnos a que estean familiarizados e cómodos cos dispositivos e
ferramentas”. O primeiro proxecto é unha adaptación do proxecto
pedagóxico da escola á contorna en liña, facendo posíbel que
“calquera persoa poida estudar música desde onde queira, ao seu
ritmo, cun trato personalizado e cun equipo de profesores expertos
nas novas metodoloxías de ensino musical”.
A
oferta educativa enmarcada na
plataforma Presto ON pon a disposición do alumnado unha serie de
recursos de forma e contido para “reducir a inseguridade que tanto
as persoas que están aprendendo música como as súas familias
poidan sentir acudindo a unha clase de xeito presencial”, ademais
de manter a continuidade do proxecto educativo se o alumno non
puidese desprazarse ao centro coa frecuencia que o modelo anterior de
ensino presencial requiría.
A
través do servizo dixital Presto ON as nenas e nenos de 6 a 7 anos
poderán cursar pre-linguaxe musical desde as súas casas, e a partir
de 8 anos calquera persoa terá oportunidade de aprender a tocar un
instrumento e cursar linguaxe musical “en formato de
presencialidade flexíbel”.
A
actividade educativa desenvolverase de xeito simultáneo na aula e
nas casas ou lugares onde se atope o alumnado, podendo cambiar a
modalidade en calquera momento sen alterar a evolución da súa
aprendizaxe.
“Dentro
da oferta educativa de Presto ON”, informa a escola coruñesa, “os
adolescentes terán tamén o seu sitio, xa que durante as clases, en
formato presencial ou online, axudarémoslles a desenvolver
todo o seu potencial e as súas habilidades musicais respectando os
seus gustos e intereses, que identificaremos nunha sesión previa, e
que nos servirá para trazar o itinerario formativo axeitado”.
Presto
Senior
A
outra gran novidade da tempada en Presto Vivace é un novo servizo
tecnolóxico concibido para as e os usuarios senior, que
segundo informan dende escola, “non terán escusa para iniciar ou
retomar a aprendizaxe musical, cunha metodoloxía personalizada
adaptada ao seu ritmo, compañeiros de viaxe afíns, e coa
flexibilidade de poder elixir a modalidade de aprendizaxe coa que
sentan máis cómodos/as: na aula ou desde as súas casas”. Trátase
do servizo Presto
Senior.