Presentados en Vigo os detalles de dous proxectos de IA e robótica para as persoas maiores
xoves, 28 de febreiro do 2019
Este
mércores presentáronse en Vigo, no CITEXVI, os resultados e
obxectivos de dous proxectos que teñen en común tirar o máximo
proveito das tecnoloxías da Intelixencia Artificial (IA) e a
robótica social para mellorar a calidade de vida dos nosos maiores,
a súa autonomía e a súa independencia. Estamos a falar do proxecto
Rising (do que
se deron a coñecer os seus froitos) e de NETA
V3A (do que se falou polo miúdo dos seus retos principais). No
acto interveu Luis Barros, director de Innovación de Atendo, empresa
líder dos consorcios formados para as dúas propostas, que salientou
a súa idoneidade para “afrontar o avellentamento da poboación e a
alta porcentaxe de persoas maiores que viven soas”.
Tamén
interviñeron M. Carmen López Pérez, responsábel da oficina de
I+D+i de Balidea; Carmen Blanco, técnica de Fruto DS; Óscar
Rodríguez, director xeral en Ledisson AIT e Helena Fernández,
Directora de eSaúde de Gradiant.
No
caso de Rising, foi impulsado polo consorcio de empresas formado por
Atendo, Fruto DS e Balidea, coa colaboración da Fundación Idis e o
ITMATI como centros de investigación, e céntrase no desenvolvemento
da solución TIC denominada NETA para a aplicación de terapias
cognitivas baseadas na vida cotiá e orientada a persoas que comezan
a sufrir un deterioro cognitivo leve. Segundo se fixo saber, diríxese
a ir alén dos atrancos habituais das persoas maiores coas novas
tecnoloxías, proporcionándolles “unha ferramenta especificamente
pensada para elas, que facilite a súa adherencia ás terapias dun
xeito non invasivo, a través de técnicas de gamificación e
fomentando a comunicación social coa súa familia e seres queridos”.
Segundo fixo saber Luis Barros, “esta é precisamente unha das
claves desta ferramenta, a comunicación emocional, a mestura dos
vínculos afectivos, sociais e a actividades da vida cotiá coa
supervisión sanitaria”.
Na
cita tamén se debullaron os obxectivos de NETA V3A, que complementa
a NETA e que vén da man de Atendo, Fruto DS e Balidea, xunto a
Ledisson AIT e con Gradiant como centro tecnolóxico asociado. Como
continuación do proxecto anterior, vaise conectar a plataforma NETA
cun robot co que as persoas maiores se poderán comunicar a través
da voz. A idea é permitir que a persoa usuaria poida realizar
accións como introducir ou consultar eventos de calendario, como
pode ser unha cita médica, facer videochamadas, realizar unha busca
en Internet, consultar e almacenar datos de saúde como a tensión
arterial ou os niveis de glucosa ou solicitar a información
meteorolóxica.
Estes
proxectos están subvencionados pola Axencia Galega de Innovación
(GAIN), co apoio da Consellería de Economía, Emprego e Industria da
Xunta de Galicia, e co-financiados polo Fondo de Desenvolvemento
Rexional (FEDER) da Unión Europea.
Sobre
Rising e NETA
Na
presentación celebrada en Vigo fíxose fincapé en que o principal
resultado de Rising foi o desenvolvemento de NETA, que abre as portas
ás persoas usuarias para realiza terapias cognitivas baseadas en
actividades cotiás, ao mesmo tempo que as conecta coa súa familia e
os profesionais sanitarios. NETA, amais, fai seguimento da súa
actividade e “supón un apoio no día a día, tanto das persoas
usuarias como da súa familia, dotándoos de autonomía e
independencia”, informouse, ao que se engadiu que NETA vertebra un
servizo social dixital centrado nas persoas (ACP, Atención Centrada
nas Persoas) co obxectivo de diminuír o seu illamento que pode ser
debido a múltiples factores: derivado dun deterioro cognitivo, da
fenda dixital ou simplemente da realidade sociodemográfica.
Durante
os últimos meses do proxecto, de setembro a decembro de 2018,
realizouse un proxecto piloto con usuarios reais, obtendo “resultados
moi satisfactorios”, segundo salientaron as empresas impulsoras da
iniciativa, que tamén destacan o alto grao de aceptación da
solución por parte das persoas participantes: tanto usuarios
directos como familiares e especialistas destacaron o seu fácil
manexo. Este proxecto mobilizou unha inversión total de 1.118.000€,
contando cunha axuda de 559.091€ por parte da Axencia Galega de
Innovación.
NETA
V3A
Polo
que se refire a NETA V3A, o seu obxectivo xeral foi desenvolver un
robot asistencial 100% galego que axudase aos maiores a ficar na súa
contorna o maior tempo posíbel, fomentando hábitos de vida
saudábel, apoiando tratamentos farmacolóxicos e médicos, facendo
seguimento e ofrecendo seguridade. De igual maneira, preténdese que
o robot non só cumpra cunha tarefa asistencial, senón tamén
social, proporcionando acompañamento mediante Intelixencia
Artificial (IA), alentando a participación activa da persoa na súa
contorna.