Presentado o software Termagal
venres, 10 de xullo do 2015
Hoxe presentouse
no Balneario de Lugo o proxecto Termagal, unha
iniciativa destinada a crear unha ferramenta de xestión médica e
documentación que permitirá, en palabras dos seus responsábeis, “a
estandarización dos procesos de asistencia médica nos balnearios de
Galicia”. A presentación contou coa presenza da directora de
Turismo de Galicia, Nava Castro, e máis do presidente da Asociación
Galega da Propiedade Balnearia, Antonio Garaloces, do decano da
Facultade de Medicina da Universidade de Santiago de Compostela, Juan
Gestal e a xefa territorial da Consellería de Sanidade en Lugo,
Patricia Daporta.
Segundo explicou a
directora de Turismo de Galicia (departamento que colaborou no
desenvolvemento de Termagal), este software permitirá a
homoxeneización da recollida de historias clínicas de pacientes e,
polo tanto, facilitará a súa xestión. Nava Castro afirmou que “con
Termagal a proposta de servizos de saúde revalorizarase grazas ao
seguimento dos casos atendidos e dos resultados obtidos”. Asemade,
dixo que “Termagal supón un empuxe fundamental para continuar
consolidando Galicia como destino termal de referencia”.