Premiados pola Cámara de Santiago os novos proxectos 3Drone&Safety e Lux Xperience
xoves, 12 de marzo do 2020
A
Cámara
de Comercio de Santiago e Abanca entregaron este xoves 12 de marzo os
premios da sexta edición do Premio Camiño do Emprendemento, co
patrocinio da entidade financeira. Foron recoñecidas tres
iniciativas empresariais innovadoras e altamente creativas:
3Drone&Safety, Lux Xperience e unha terceira iniciativa de
prestación de servizos deportivos impulsada polo emprendedor Marcos
Heleno Vidal. Segundo fixeron saber as ditas entidades, as
distincións son un recoñecemento que busca visualizar novos
proxectos e apoialos, “coa finalidade de axudar á reactivación da
economía e o emprego dos trinta e dous concellos da demarcación
cameral”.
O
premio cubrirá o 50 por cento dos gastos da estadía no viveiro de
empresas de Costa Vella durante un ano aos proxectos distinguidos. Os
gañadores poderán solicitar as liñas de financiamento presentadas
por Abanca con condicións financeiras preferentes. Durante ese
tempo, ademais do servizo de aloxamento, infraestrutura e loxística,
recibirán servizos de acompañamento, consultoría e asesoramento,
coa finalidade de favorecer a súa arrincada.
O
xurado composto por representantes da Cámara de Comercio e de Abanca
tivo en conta na súa decisión o nivel de desenvolvemento do
proxecto, o seu carácter innovador, o volume de investimento, o grao
de proxección nacional e internacional, a posíbel xeración de
postos de traballo e a experiencia previa dos participantes.
3Drone&Safety
Este
proxecto liderado por José David Aldana e Adán Fariña consiste na
creación dunha empresa con capacidade para vender software
fotogramétrico e en ofrecer servizos personalizados de topografía e
fotogrametría.
Marcos
Heleno Vidal – Servizos Deportivos
A
idea principal deste proxecto, liderado por Marcos Heleno, é a
creación dunha empresa deportiva con sede en Santiago que lle
permita estender a súa actividade a toda Galicia. O seus servizos
dirixiranse ao deporte en xeral, partindo da base do fútbol que é
onde o emprendedor ten máis experiencia.
Lux
Xperience
Este
proxecto, liderado por Andrés Rodríguez, Anxo Boado, Daniel Castro
e Daniel Mourelos, consiste no deseño e comercialización de
experiencias turísticas a enclaves culturais mediante o uso da
tecnoloxía da realidade mixta a través dunhas gafas que permitan ao
usuario ver o entorno real que lle rodea mediante a tecnoloxía da
Realidade Aumentada e a Realidade Virtual.