Premiado en Santiago un vídeo sobre a morte de ampla pegada no YouTube
luns, 13 de xuño do 2016
Os días pasados
celebrouse en Santiago a terceira edición do RSEncontro,
un evento de alcance estatal dirixido a pór de relevo o traballo
daquelas persoas, entidades e empresas cun firme compromiso a prol da
ética empresarial e a actividade corporativa solidaria. No marco da
actividade foi elixido como Mellor Proxecto de Responsabilidade
Social Corporativa o vídeo Acompañámoste
no teu camiño, do Grupo
ASV Servizos Funerarios, con sede central en Alacante. A
responsábel da área de Responsabilidade Social Corporativa (RSC) de
ASV, Sonia Carricondo, foi a encargada de presentar esta campaña
creada co obxectivo “de concienciar na sociedade sobre o ciclo da
vida, desde a sensibilidade e as ligazóns emocionais que van máis
aló da morte”. O vídeo guindouse á Rede en decembro de 2015 e
nunha semana acadou 200.000 visualizacións. En pouco máis dun mes,
superou o medio millón.
Segundo informou Sonia
tralo seu lanzamento converteuse nun dos cinco vídeos máis
populares de YouTube en España, compartindo ranking con
compañías e marcas como GoPro, Amstel ou a propia YouTube. Ademais,
foi finalista nos Premios ALCE 2016, galardóns anuais que entrega a
Asociación de Empresas de Publicidade da Provincia de Alacante, nas
categorías de Campaña Global Online e Spots. Segundo
fixo saber a empresa en Santiago, un dos grandes obxectivos foi
“sensibilizar, a través da TV e a Internet, sobre un tema tan
difícil e en ocasións mesmo tabú, como é o tema da morte”. O
vídeo forma parte dunha campaña con páxina web de seu,
entucamino.es.
Sonia Carricondo amosou
en Santiago a satisfacción da empresa que representa: “Estamos moi
orgullosos deste recoñecemento por parte dun público especializado
no sector da responsabilidade empresarial, xa que esta campaña
aspira a acompañar e a mellorar a nosa contorna visualizando un tema
tan delicado e sensíbel na nosa sociedade como é o da morte, a
despedida dos nosos seres queridos e a superación do doo, o reto
principal da nosa compañía”.
O
evento RSEncontro celebrouse entre o 9 e o 11 de xuño no Centro
Abanca Obra Social da Praza de Cervantes. Contou con presenza de
firmas e profesionais estatais pero tamén con representantes do
sector do emprendemento social e de consumo responsábel da nosa
terra, por exemplo as firmas Saraiva Senior, Fundación Lonxanet,
Galletas Daveiga, Discamino, Vojo, Arqueixal e Promove.