Pontevedra pon en marcha unha plataforma para intercambiar libros de balde entre as familias
venres, 22 de xuño do 2018
O
Concello de Pontevedra activou esta semana unha plataforma para
favorecer o intercambio de libros escolares, unha medida que vén moi
a conto ante a relativamente próximo curso escolar e ante a
constatación de que unha iniciativa coma esta pode achegar segundas
e terceiras vidas, entre familias pontevedresas que o precisen, a uns
libros que doutro xeito ficarían en desuso. Estamos
a falar da plataforma Trocalibros, que xa ten enderezo en liña,
trocalibros.pontevedra.gal
e que está concibida para todos fogares dispostos a permutar manuais
que non entran no banco de libros escolar.
A
iniciativa vén da man das concellarías de Benestar Social,
Educación e Novas Tecnoloxías e ten a súa orixe nunha evidencia: a
de que existe unha relevante porcentaxe de poboación que fica fóra
do sistema de préstemo de libros da Xunta de Galicia (e do banco de
libros escolares) pero que están en disposición de intercambiar os
libros das súas crianzas, “ampliando a vida útil dos mesmos,
ademais de ter outras avantaxes como reducir a cantidade de
refugallo, crear unha conciencia social (e escolar) fronte ao
consumismo, e construír unha sociedade máis sustentábel e
solidaria”, segundo informaron as ditas concellarías, que tamén
salientan da plataforma o doado do seu manexo e a súa autonomía
(aínda que está supervisada polos servizos municipais).
Os
catro requisitos necesarios para participar son os seguintes: que os
escolares cursen estudos en centros educativos da cidade, que
participen familias con fillas/os de entre terceiro de Primaria e
segundo de Bacharelato, que os libros estean en bo estado e que non
se requira cantidade económica algunha polos manuais (o intercambio
é de balde).
O
Concello aproveitou para facer entre as familias un chamamento a
participaren, pois “o seu éxito será maior cantas máis familias
tiren proveito da plataforma”.