Ponteareas activa nas redes sociais un concurso para apoiar aos establecementos locais
venres, 24 de abril do 2020
O
Concello de Ponteareas puxo en marcha este xoves 23, nas redes
sociais Instagram e Facebook, unha campaña de apoio ao comercio e a
hostalaría local para estes tempos de confinamento e crise
sanitaria, e tamén, con vistas ao tempo de desescalada
e recuperación económica que veña despois. A
iniciativa, que se desenvolve baixo o cancelo #FaiPonteConNós,
estase a materializar xa con accións directas para incentivar o
consumo nos establecementos locais: un directorio e un concurso.
Por
unha banda, creouse un directorio de actividades en funcionamento
durante o Estado de Alarma, onde se detallan os servizos e produtos
que se ofrecen, se o establecemento conta con entrega a domicilio,
etc. A listaxe, informa o Concello, irase actualizando conforme se
produza a desescalada da pandemia e outros establecementos
poidan ir abrindo. Para figurar os negocios que teñan interese deben
solicitalo á Concellaría de Promoción Económica a través de
promocioneconomica@ponteareas.gal ou no teléfono 673855422
Ao
mesmo tempo, o dito departamento convocou o concurso Eu creo na
casa, para dar a coñecer e premiar a creatividade da veciñanza
durante o período de confinamento e, ao mesmo tempo, apoiar ao
comercio e hostalaría local na súa recuperación económica. No
certame establécese unha ducia de categorías: artes plásticas,
fotografía, conto infantil, relato, poesía, cómic, artes
escénicas, xogos, cociña e receitas. As persoas participantes poden
concursar en todas elas. As diferentes creacións serán compartidas
desde o 28 até o remate do Estado de Alarma e débense plasmar en
textos, vídeos e fotografías, figurando neles, de forma visíbel, o
cancelo #FaiPonteConNós.
Outorgaranse
dous premios de 50 euros por cada categoría para os participantes
que obteñan maior número de gústame. O resto de
concursantes participarán nun sorteo de 440 vales de 20 euros. Asi,
os premios ascenden a un importe de 10.000 euros que se traducirán
en ingresos para o comercio e hostalaría por ese importe, “ademais
dun incentivo para un maior consumo nese sector”, en palabras da
Concellería.
As
bases completas do concurso e sorteos poden consultarse na
páxina web do Concello e nas redes sociais da Concellería.