#PonteLovers e AJE Pontevedra introducen ás pemes locais nas novas faces da mercadotecnia
luns, 30 de novembro do 2020
A
Concellería
de Promoción Económica e Turismo, a través da plataforma
#PonteLovers, e a Asociación de Empresarios Novos (AJE) de
Pontevedra desenvolverán durante o mes de decembro un ciclo de
charlas sobre nova mercadotecnia (marketing)
especialmente destinado a emprendedores, pequenos empresarios e
profesionais. As conferencias serán impartidas de xeito virtual, a
través de Zoom, polo consultor de estratexia e comunicación Javier
Varela e celebraranse os días 3, 10, 17 e 22 de decembro en horario
de 16.30 a 17.30 horas (uns 45 minutos de charla e 15 minutos para a
quenda de preguntas e o debate posteriores).
A
concelleira de Promoción Económica, Yoya Blanco, comentou que o
obxectivo principal deste ciclo “é o de formar aos asistentes nos
cambios que se están a producir no mercado e sobre como as pequenas
empresas poden aproveitar e optimizar os seus recursos para ser
competitivas e sobrevivir neste contexto”. E engadiu: “Trátase
de pequenos cursiños cun carácter eminentemente dinámico e
participativo, nos que, á hora de explicar cada un dos conceptos que
se presenten, incluiranse exemplos de casos de éxito no emprego de
Internet e das redes sociais a nivel profesional”.
As
charlas-cursos organizados versarán sobre Tips de Márketing para
emprendedores, RRSS para emprendedores, Tips de
Iniciación ao Comercio Electrónico e Márketing e
Sostibilidade: Una Estratexia de Futuro e Presente. O
relator-titor das mesmas, Javier Varela, é consultor en Toctocmedia,
axencia especializada en mercadotecnia en liña, estratexia e
comunicación. Varela é tamén responsábel de interim márketing
en Gradiant-Centro Tecnolóxico de Telecomunicacións e consultor en
EOSA Estratexia e Organización, así como profesor colaborador na
Escola de Negocios IESIDE, a Universidade de Vigo e a Escola de
Organización Industrial EOI. Asemade, é administrador do blog The
Orange Market. As charlas son de acceso libre.
