Política Lingüística e Igaciencia premian no certame Novos Poliedros a innovación xuvenil en galego

Este luns pola mañá celebrouse no Pazo de San Roque (Santiago) o acto de entrega da terceira edición do certame Novos Poliedros, convocado co gallo do Mes da Ciencia en galego por Igaciencia (Institución Galega da Ciencia) coa colaboración da Secretaría Xeral de Política Lingüística co obxectivo de “promover entre a mocidade a innovación científica en lingua galega”. Participaron Manuel Día, responsábel da dita institución, e Valentín García, secretario xeral de Política Lingüística, quen destacou o papel de iniciativas coma esta “para mostrar á rapazada, dun xeito lúdico.
García sinalou que non é incompatíbel en absoluto co rigor e a calidade, o papel que o galego, como calquera outra lingua, pode ter no ámbito científico”.
Centros premiados
Na edición 2023 de Novos Poliedros resultaron gañadores sete institutos procedentes das catro provincias galegas: o IES Monelos, o IES Menéndez Pidal-Zalaeta e o IES Rafael Puga Ramón, da Coruña; o IES As Lagoas, de Ourense; o IES Santiago Basanta Silva, de Lugo, e o IES de Meaño e mais o IES do Barral, de Pontevedra.
Os gañadores, que expuxeron no acto os seus traballos, recibiron un premio de 100 euros por centro e un lote de libros e un diploma como agasallo. Ademais, nesta terceira edición concedéronse dous accésit ao IES Gregorio Fernández, de Lugo, e ao IES Nº 1 de Ribeira, na Coruña.
Este concurso, que homenaxea a figura de Evarist Galois, creador do concepto de grupo e da simetría científica, busca incentivar entre a rapazada o interese pola ciencia, en particular pola xeometría e pola simetría, amosándolle a súa importancia no estudo do universo, da estrutura química ou dos seres vivos, ao tempo que promove o uso da lingua galega entre a mocidade. A partir dunha listaxe de poliedros, os centros participantes elixiron e reproduciron un ou varios deles utilizando o material que tivesen da súa man, desde impresoras 3D até simples cartolinas e, finalmente, nomeárono cun nome orixinal en galego.
Os vídeos cos proxectos gañadores poden consultarse na páxina web de Igaciencia.