Política Lingüística e AMTEGA completan a oferta formativa de autoaprendizaxe en liña para o CELGA
xoves, 9 de febreiro do 2023
A
Secretaría Xeral de Política Lingüística puxo en marcha o novo
curso de autoaprendizaxe en liña preparatorio do nivel 3 do CELGA
(Certificado de Estudos de Lingua Galega). Así o fixeron saber na
mañá deste 9 de febreiro o
secretario xeral Valentín García, e o director da Axencia para a
Modernización Tecnolóxica de Galicia (AMTEGA), Julián Cerviño.
Segundo
explicaron, trátase dun curso de galego que “axuda a mellorar o
coñecemento desta lingua e a preparar as probas para obter o CELGA
3, ofertado na modalidade de autoaprendizaxe en liña a través da
plataforma de teleformación da Secretaría Xeral de Política
Lingüística”.
Con
el, dixeron, “buscamos responder á crecente demanda de estudo do
galego cunha maior flexibilidade e sen límites”, indicou o
representante da Consellería de Cultura e Educación, engadindo que
“con este último curso xa temos completa a oferta de autoformación
en todos os niveis CELGA”.
Pola
súa banda, Julián Cerviño enmarcou esta actuación nas iniciativas
que se levan a cabo dende a Xunta de Galicia para “consolidar a
lingua e a cultura de Galicia nos ámbitos dixitais”. Citou, entre
outros, o Proxecto Nós para colocar ao galego na vangarda das
tecnoloxías intelixentes, ou a Memoria Dixital de Galicia.
Tamén
dixo que as actuación que se levan a cabo dende a axencia AMTEGA
“non soamente permitirán aprender e certificar o uso do galego ou
falar no noso idioma cos asistentes virtuais, senón tamén acceder
a todos os recursos culturais e históricos nesta lingua”.
Na
presentación, celebrada na sede de AMTEGA na Cidade da Cultura,
tamén participaron a subdirectora xeral de Política Lingüística,
María Lourdes Batán, e o representante de Imaxin/software, Diego
Vázquez, empresa que colabora no desenvolvemento dos cursos.
Autoformación
en todos os niveis CELGA
O
curso constitúe unha adaptación (en liña e de
autoaprendizaxe) a partir do curso de CELGA 3 con
titorías e contén exercicios de léxico, gramática e comprensión
e expresión oral e escrita. Componse de oito unidades cunha media de
30 actividades cada unha nas que o o alumnado poderá comprobar os
seus progresos e consultar as respostas. Ademais dos modelos resoltos
de exames oficiais do certificado, hai dispoñíbel un vídeo
interactivo final de repaso para comprobar o aprendido en
cada unidade.
A
inscrición neste novo curso poderá realizarse a partir
da segunda quincena de febreiro na plataforma de teleformación da
Secretaría Xeral de Política Lingüística. Ademais, a diferenza
dos cursos tirorizados, non hai límite de prazas nin suxeición a
datas ou horarios de impartición.
Con
este curso, a Secretaría Xeral de Política Lingüística completa a
oferta formativa de autoaprendizaxe en liña de todos os niveis
CELGA, que comezou en 2021 co CELGA 1 e que continuou en 2022 co
CELGA 2 e 4 e cos que se formaron, ata o de agora, máis de 7.000
persoas.