Pechou en Santiago o programa de creación de industriais culturais e innovadoras con 16 novas firmas
mércores, 25 de novembro do 2015
A Cámara
de Comercio de Santiago de Compostela e a Fundación Cidade da
Cultura de Galicia clausuraron este xoves o seu programa conxunto
para impulsar a posta en marcha de industrias culturais e creativas,
amais de axudar ao seu afianzamento no mercado. O programa, que foi
de balde e contou co pulo da Fundación INCYDE, impartiuse para un
total de 16 alumnas e alumnos na incubadora empresarial de Costa
Vella do 13 de outubro ao 13 de novembro. A iniciativa, en palabras
dos seus responsábeis, dirixiuse “a vestir “as ideas
empresariais relacionadas coas artes, teatro, música, danza, os
sectores audiovisual e editorial, e tamén as actividades vinculadas
ás novas tecnoloxías e ao deseño”.
Os participantes, segundo
se fixo saber no acto de clausura, adquiriron coñecementos para
crear unha empresa cultural “cun enfoque creativo e novos modelos
eficientes de financiamento e xestión destinados a actualizar os
procesos de produción, distribución, exhibición e difusión dos
produtos culturais”. Asemade, informouse que o programa comezou a
funcionar en 2010 para dar formación (até a data) a 1.055 persoas.
Coa iniciativa rematada, ofreceu aos participantes o apoio e
asesoramento telefónico de INCYDE para os vindeiros meses para
consultar as dificultades que poidan xurdir no proceso de creación
da empresa. Ademais, lembrouse que un grupo de consultores fará
seguimento dos proxectos impulsados durante os vindeiros seis meses.
Tamén se fixo saber que INCYDE abrirá axiña unha canle na súa web
para dar visibilidade ás empresas culturais de nova creación con
vídeos de promoción de tres minutos.
O programa, dirixido a
empresarios e responsábeis de pequenas empresas culturais e
creativas, desenvolveu contidos sobre administración da empresa
cultural, mercadotecnia e comercialización, prevención de riscos
laborais, calidade medioambiental e igualdade de oportunidade,
xestión financeira e económica e novas tecnoloxías da información
e ferramentas informáticas. O programa, coordinado pola técnica de
INCYDE Ana Velasco, contou coa participación de dezaseis proxectos,
trece para converter a súa idea nunha empresa de creación cultural
e tres para consolidación empresarial.
Entre os emprendedores
que participaron no programa atopábase Diego Freire, responsábel da
compañía teatral Producións Dispersas, e máis a editora Alicia
Romero, impulsora de Enxebre Books, creada en 2012 para publicar
libros de ficción, en formato papel e electrónico, de autores
noveis. Segundo fixo saber Romero no acto, co obxectivo de mellorar a
rendibilidade da empresa acometerá en datas vindeiras a renovación
da web de seu, ademais de crear un espazo de libraría e arranxar o
problema do custe da distribución “con solucións comerciais
propias”.