Paul Otellini anuncia a súa retirada da dirección de Intel
luns, 19 de novembro do 2012
Intel anunciou hoxe que o seu presidente e director xeral, Paul
Otellini, decidiu retirarse dos seus cargos, polo que principia un cese
paulatino das súas actividades durante os vindeiro 6 meses de xeito que na
xuntanza anual de accionistas da compañía que terá lugar en maio de 2013 poderá
dicir adeus a unha actividade na que leva preto de 40 anos.
Otellini considera que “tras preto de 4
décadas na compañía e 8 anos como director xeral é hora de apartarse e pasar o
temón de Intel a unha nova xeración de liderado”, engadindo que colaborará
no período de transición a unha nova dirección á vez que continuará a estar
dispoñible como asesor unha vez que deixe o seu cargo de director xeral.
Agora o cadro directivo da compañía pode iniciar un proceso para elixir ao
sucesor de Otellini, para o que terán en consideración tanto a candidatos
internos coma externos.
Nestes anos de traballo de Otellini podemos considerar que o rumbo de Intel foi bastante atinado, pois conseguiu dominar de xeito rotundo o mercado dos ordenadores persoais, deixando practicamente fóra de xogo ao seu principal competidor (AMD) aínda que agora atópase ante o reto de responder aos deseños ARM que están a imporse nos dispositivos móbiles, e con compañías moito máis novas como Qualcomm converténdose en grandes rivais.