Padrón reivindícase como destino seguro e de proximidade coa súa nova web
martes, 4 de agosto do 2020
O
Concello de Padrón vai poñer en marcha esta semana unha campaña
para “promover o turismo de proximidade” e mostrarse ante
visitantes e residentes como “destino seguro e libre de COVID-19”.
A iniciativa inclúe a estrea dunha páxina web,
www.padronturismo.gal, e
dunha nova marca turística: a marca Padrón Turismo. Os dous
recursos diríxense a promover a longa listaxe de atractivos
culturais, turísticos, paisaxísticos, literarios, medio-ambientais,
gastronómicos e comerciais do municipio, amais de poñer o foco na
súa forte tradición xacobea.
Trátase
dunha proposta incluída no Plan de Reactivación do Turismo e do
Comercio elaborado pola Concellería de Turismo de Padrón para os
anos 2020 e 2021.
A
concelleira de Turismo, Lorena Couso, explicou que se trata de
reivindicar Padrón como un destino de proximidade e estábel. A edil
engadiu que a iniciativa foi desenvolvida polo Concello de Padrón
con fondos propios e cun investimento de máis de 10.000 euros.
Respecto
da páxina web devandita, servirá para dar soporte á nova marca e
para exercer de punto de contacto principal de Padrón co mundo. O
sitio dixital contén ligazóns aos cinco bloques englobados en
Padrón Turismo, así como unha xanela á aplicación móbil da
Pedronía. A maiores, a páxina abranguerá tamén un apartado
denominado Experiencias, no que expertos do sector
recompilarán e porán en valor distintas actividades que se poden
realizar na vila co obxectivo de que o turista poida vivilas en
primeira persoa.
Ademais
da información de eventos, comercio, gastronomía, turismo,
natureza... o novo sitio acubillará un mercado en liña, unha
plataforma na que os distintos comercios de Padrón poderán anunciar
os seus produtos e ofrecer aos turistas un amplo abano de produtos,
propostas e servizos. “Poremos a disposición do noso comercio un
formulario en liña no que poderán engadir fotos e información, que
nós validaremos para a súa publicación na nova páxina web”,
explicou Lorena Couso.