Ourense acollerá probas de drons na procura de afloramentos fermais
xoves, 19 de marzo do 2015
A Deputación
de Ourense anunciou este mes de marzo que vai facer traballo de campo
con novos vehículos aéreos non tripulados, tamén coñecidos
como drons, co obxectivo de localizar afloramentos termais. A nova
foi dada a coñecer polo presidente do organismo provincial, Manuel
Baltar, quen participou (precisamente) nunhas probas efectuadas na
contorna das termas de Outariz, na propia capital da provincia. Nas
demostracións empregáronse vehículos aéreos con cámaras e
sensores térmicos de diferentes rangos espectrais. Segundo informou
a Deputación, estas semanas darase a coñecer un curso de
capacitación para o pilotaxe destes aparellos.
Para o organismo provincial, a aplicación de drons
para deteccións termais amosa un potencial de traballo específico e
de grandes posibilidades para o territorio ourensán, tanto para as
administracións con competencias en termalismo como para os propios
balnearios locais, "pois permítelles indagar e descubrir novos
mananciais e tamén realizar un seguimento en tempo real da
temperatura das súas augas". E engádese, salientando as
vantaxes deste tipo de tecnoloxías aplicadas á procura de
afloramentos: “O emprego de drons no ámbito termal ofrece
fiabilidade na detección máis a vantaxe dun baixo custe con
respecto da fotografía por satélite que se empregaba até o de
agora”. A Deputación tamén valorou moi positivamente o feito de
que os aparellos non tripulados acheguen meirande flexibilidade de
cara a fixar criterios de procura máis específicos.