Os xardíns do Campus de Ourense, polo miúdo na Rede
xoves, 20 de xaneiro do 2011
A Oficina de Medio Ambiente da Universidade de
Vigo quere poñer en valor os xardíns do Campus de Ourense, especialmente
valiosos pola súa riqueza botánica intrínseca e máis polo que poñen en xogo de
integración da comunidade educativa coa paisaxe da contorna. Dáse a
circunstancia de que unha boa parte deste
traballo de valorización pasa pola Rede. De aí que a Oficina puxera en
marcha un novo apartado na súa web para dar acubillo a tódolos usos de lecer
que se lle poden dar estes enclaves. A
nova sección, chamada Ruta da Árbores,
achega entre outras cousas a posibilidade de percorrermos estes xardíns nunha
visita guiada.
O proxecto en liña non xorde da nada.
Previamente a dita Oficina despregou unha serie de traballos dirixidos a
estudar e rexistrar as moitas especies ornamentais (25) ás que dan acubillo
estes espazos de lecer. A información resultante emprazouse en dous planos: no
físico (ao pé de cada especie, con feitura de ficha) e no dixital (na devandita
web). A través das fichas de cada árbore, informa o departamento da
Universidade de Vigo, os visitantes-internautas poden coñecer especies de case
cen anos, como os cedros do Atlas, o Líbano e o Himalaia, ou o abeto de
Douglas, unha das árbores que alcanza maior altura no mundo. Entre as achegas
que proceden da nosa terra, cómpre salientar importantes exemplares de acivro,
loureiro e érbedo.
Como se dixo, o obxectivo de todo este
traballo en liña é favorecer o coñecemento dos xardíns, servindo de paso previo
para unha visita guiada en grupo dos internautas. Nesta visita, o persoal da
Oficina de Medio Ambiente explicarlles aos participantes a natureza destas
especies e a riqueza botánica da zona.