Os segredos da Pontevedra medieval, nun videoxogo xurdido na UVigo
martes, 17 de decembro do 2019
A
Universidade de Vigo segue a ser un fervedoiro de aplicacións,
videoxogos e proxectos tecnolóxicos varios. Hoxe soubemos que do
Campus de Pontevedra vén de abrollar un videoxogo para dar a
coñecer, dun xeito enriquecedor, dinámico e divertido, o patrimonio
medieval desta cidade. O videoxogo, que guía aos usuarios nun
percorrido pola Pontevedra máis antiga, achega un desafío concreto:
quen se introduza nel, terá que atopar na urbe medieval unha serie
de elementos para, ao remate do camiño, resolver un enigma final.
Niso
consiste Ponte Veteri, o xogo desenvolvido polo grupo de
innovación docente ComTecArt, que integran docentes da Facultade de
Ciencias Sociais e da Comunicación e da Escola de Enxeñaría de
Telecomunicación, no marco das accións impulsadas polo Concello
de Pontevedra con motivo do 850 aniversario do foro da cidade. Amais
disto, o grupo traballou tamén no deseño dunha unidade didáctica
para escolares e nunha aplicación que engadirá contidos de
Realidade Virtual á exposición O segredo da ponte do Burgo,
que se inaugura este xoves ás 18.30 horas no Pazo da Cultura.
Esta
serie de iniciativas foron presentadas este martes polo concelleiro
de Patrimonio, Xaquín Moreda, xunto aos integrantes do grupo
ComTecArt Beatriz Legerén e Antonio Pena e a directora artística do
xogo, Olaia Ferrando.
No
marco desta colaboración entre a Concellería de Patrimonio e
ComTecArt, o grupo responsábel dunha iniciativa na que estudantes de
CCSS e da Comunicación e da EE de Telecomunicación traballan
conxuntamente no deseño de videoxogos, unha das propostas a
desenvolver era a de sumar un pequeno complemento tecnolóxico a unha
ruta pola parte medieval da cidade. En palabras de Antonio Pena,
investigador de AtlantTIC, “conforme comezamos a documentarnos,
vimos que había moito material”, polo que optaron finalmente por
asociar unha trama a este percorrido, de tal xeito que “o que ía
ser un roteiro gamificado pasou a ser un videoxogo”, en cuxo
desenvolvemento participaron ex-alumnos de CCSS e da Comunicación,
da EE de Telecomunicación e Belas Artes.
Á
aplicación, que leva o nome dado á cidade no documento do foro e
que estará dispoñíbel nas vindeiras semanas, levará aos xogadores
e xogadoras a percorrer, partindo da ponte do Burgo, unha parte da
zona antiga da cidade. Segundo explicou Pena, terán que ir camiñando
por Pontevedra para poder ir activando elementos e en cada un deles
iranse atopando con minixogos, até chegar a un enigma final que hai
que resolver.