Os premios á innovación 2.0 de AGESTIC resólvense este xoves 14 en Santiago

Este xoves día 14 de outubro, o Centro On de Caixa Galicia en Santiago vai dar acubillo á entrega dos Premios INNOVA G 2010, convocados pola asociación galega AGESTIC co obxectivo de salientar as mellores propostas do ano á hora de contribuír a que a nosa terra marque diferenzas en materia de desenvolvemento tecnolóxico. O acto, que dará comezo ás 12 horas e contará coa presenza de diversas personalidades do eido institucional e corporativo, porá o punto e final á convocatoria 2010 (a primeira) dos premios ás iniciativas emprendedoras e innovadoras en Web 2.0 que organizou AGESTIC na nosa terra.
Segundo informa esta asociación, “a resposta foi moi importante, considerando que se trata da estrea dos galardóns, polo que é unha gran satisfacción ter acadado que participasen no certame máis de 60 empresas con máis de 100 candidaturas ás diferentes categorías, baténdose ademais un récord de concorrencia a través de Internet con preto de 12.000 internautas votando os premios populares”.
O xurado estivo composto polos representantes das entidades que promoveron e apoiaron estes premios: IGAPE, Secretaría Xeral de Modernización, Secretaría de Medios, Dirección Xeral de Promoción do Emprego, Universidade de Vigo - Escola Superior de Enxeñería Informática e Grupo Femxa.
Os membros do xurado, informa AGESTIC, estarán presentes e entregarán os premios no evento do día 14 de Outubro ás 12:00 horas no Centro ON de Caixa Galicia de Santiago de Compostela, Rúa Nova 33.
As categorías que se inclúen no certame que se resolve este xoves son as seguintes: mellor idea de negocio 2.0, mellor emprendedor galego 2.0, mellor campaña social media, mellor iniciativa de apoio á innovación, mellor desenvolvemento 2.0, mellor aplicación para dispositivos móbiles, mellor solución tecnolóxica móbil, mellor deseño para todos, mellor desenvolvemento centrado nos cidadáns, mellor desenvolvemento de RSE e mellor desenvolvemento audiovisual en internet.