Os percorridos virtuais sobre a Xeración Nós xa chegaron a preto de 3.000 estudantes
martes, 22 de decembro do 2020
O
libro Arqueoloxía
do noroeste peninsular en tempos de Nós,
impulsado polo Goberno galego e o Seminario de Estudos Galegos, foi
presentado este
martes 22 na
sede da Delegación de Ourense polo secretario xeral de Cultura, Anxo
M. Lorenzo, e o delegado territorial da Xunta en Ourense, Gabriel
Alén.
A obra, incide na importancia da Xeración Nós para o
desenvolvemento dos decisivos
e determinantes
estudos que
sacaron á luz os vestixios, pegadas e sinais da nosa historia.
Enmárcase
nas actividades programadas con motivo do centenario da revista Nós.
Na
presentación fíxose balance da actividade online
xerada polo programa conmemorativo deste centenario. Informouse, por
exemplo, dos preto de 3.000 estudantes que se achegaron ao legado dos
intelectuais homenaxeados a través das novas tecnoloxías grazas aos
percorridos virtuais para centros educativos.
O libro presentado este martes
estruturase en nove capítulos e reflicte o movemento pioneiro da
Xeración Nós no ámbito literario e científico. O primeiro
capítulo céntrase na Prehistoria, mentres que os catro seguintes
analizan a figura de López Cuevillas como pioneiro do coñecemento
científico sobre a cultura castrexa, investigador da prehistoria e
colaborador sobre o mundo romano e etnógrafo. Os demais capítulos
afondan na relación da Xeración Nós coa arqueoloxía do norte de
Portugal e coa investigación arqueolóxica na Coruña, en Lugo e en
Pontevedra.
O representante da Consellería
de Cultura, Educación e Universidade sinalou “o importante papel
que xogou Florentino López Cuevillas no eido da arqueoloxía
galega”. De feito, as súas importantes achegas quedan reflectidas
no libro, xa que catro dos noves capítulos totais, están dedicados
a súa figura. Doutra banda, Anxo M. Lorenzo explicou que “tanto o
Museo Arqueolóxico de Ourense como o Castro de San Cibrao de Las,
están moi unidos ao traballo de Cuevillas”.
Exposición e nova web
O lanzamento desta publicación
enmárcase nos actos impulsados pola Xunta con motivo do centenario
da Xeración Nós, unha efeméride que se vén celebrando ao longo de
todo o ano co obxectivo de poñer en valor a inmensa herdanza que
deixaron estes referentes culturais.
Así,
a programación deseñada para esta conmemoración que se alongará
ata 2021 está composta por publicacións, homenaxes, recoñecementos
e exposicións entre as que se atopa a creación dunha páxina web
que aglutina todos os contidos do universo Nós,
(revistanos.galiciana.gal),
ou a exposición Galicia,
de Nós a nós,
a gran mostra sobre os
intelectuais que forxaron o galeguismo do século XX e
que reúne na Cidade da Cultura máis de 300 pezas procedentes de
España, Francia, Alemaña e Portugal e que desde a súa
inauguración, o pasado mes de outubro, xa foi visitada por máis de
10.000 persoas de xeito presencial. A esta cifra súmanse os preto de
3.000 estudantes que se achegaron ao legado de Nós a través das
novas tecnoloxías grazas aos percorridos virtuais para centros
educativos. En total, participaron nesta actividade 50 centros de
toda a Comunidade.
O
Grupo Nós
O 20 de outubro de 1920 naceu na cidade de Ourense
a revista Nós. Arredor dela xurdiu un grupo de autores
literarios que, a partir da Asemblea de Monforte (1922), fóronse
integrando nas estruturas das Irmandades da Fala. A revista Nós
estaba conformada principalmente na súa orixe polos integrantes do
cenáculo ourensán (Vicente Risco, Ramón Otero Pedrayo, Antonio
Losada Diéguez e Florentino López Cuevillas) e máis o intelectual,
artista e político rianxeiro Alfonso Daniel Rodríguez Castelao. Nos
anos seguintes a revista verá chegar novos autores.
Baixo a denominación de Xeración Nós ou Grupo
Nós inclúense polo tanto os autores vencellados á devandita
revista. Teñen en común ter sido dinamizadores activos da cultura e
a lingua galegas, amais de estaren moi involucrados no eido político
do seu tempo, ligados principalmente ao Partido Galeguista, que
contribúen a crear.