Os pais de Internet avogan por unha Internet máis segura e popular
xoves, 23 de abril do 2009
O Palacio Municipal de Congresos de
Madrid, que durante toda esta semana alberga o Congreso
Internacional World Wide Web, WWW 2009 por primeira vez na historia do noso
país, tivo o privilexio de dar acollida a dúas das persoas que máis influíron
na creación da Rede de redes e ás que máis lles debemos agradecer o feito de
que hoxe poidamos facervos chegar esta nova a través do noso portal: Tim
Berners Lee e Vint Cerf, os mundialmente coñecidos como “pais” de Internet.
Coincidindo co 20
aniversario do nacemento da Word Wide Web, o que fai deste Congreso unha cita
aínda moito máis interesante se cabe, Berners Lee e Cerf achegáronse á capital para
dar conta dos seus coñecementos e opinións en torno a este novo medio de
comunicación que coñecen como ninguén no mundo e, como era de agardar, a súa
visita non deixou a ningún asistente indiferente.
O creador da Web, que avoga
pola sinxeleza e a modularidade, declarou que desexa que a web se desenvolva
seguindo un modelo “extensible e modular,
onde os datos e arquivos se interconecten dunha maneira doada”. Para isto,
engadiu, é preciso contar cunha “tecnoloxía
clara, que simplifique as cousas”.
Asemade, o artífice da Web,
nomeado onte doctor honoris causa xunta a Vinton Cerf, pola Universidade
Politécnica de Madrid, insistiu en que será esa interconexión de datos “a que propicie a aparición da Web 3.0”.
Berners-Lee coincide con
Vinton Cerf e outros expertos, no potencial que teñen as tecnoloxías móbiles
para achegar Internet a aqueles que aínda nunca tiveron unha experiencia web e
este último engade que “habería que crear
novas formas de interacción cos contidos, como pode ser a voz”.
Cerf engadiu que ve “un futuro con máis Internet, máis usuarios,
máis móbiles, e un acceso máis rápido”, nembargantes, asegurou que nunca
antes tivera acceso a tanta información de xeito tan rápido e en calquera
lugar.
Ademais dos relatorios
propiamente ditos, tanto o pai de Internet como o da Web tiveron tempo para dar
conta dalgunhas anécdotas (para deleite dos alí presentes) e o propio Lee
admitiu ter sido vítima dun fraude en liña había poucos meses, algo que, no seu
momento, lle fixo reflexionar sobre o futuro da web.
Neste senso, declarou,
que lle gustaría que a Rede medrase “con
orde e limpeza”, aínda que admitiu que iso era “o máis difícil”.
Para rematar, Lee
describiu cal era o seu soño, que vindo dunha persoa coma el, non podía ser
outro que “facerlle unha pregunta a un
ordenador conectado e que vaia aos índeces e me dea unha resposta acertada e
comprensible”.
O tempo diranos se
Berners-Lee cumpre o seu soño.