Os novos trebellos de Pioneer ou Philips integrarán conectividade a Spotify
xoves, 5 de setembro do 2013
Xigantes históricos da
electrónica e do son como Denon, Hama, Marantz, Philips ou Pioneer
están
a anunciar acordos con Spotify, servizo de música en streaming,
destinados a integrar a conectividade a esta plataforma nun bo número
dos seus novos dispositivos a través do software Spotify Connect, un
recurso que se vai presentar polo miúdo no salón IFA de Berlín
e que subministraría un novo xeito de enfrontármonos coa nosa
música preferida. Este programa, informa Pioneer, unha das
directamente implicadas, achega entre outras cousas “unha
revolucionaria experiencia de home audio
que permite aos usuarios controlar a súa música de maneira sinxela
desde calquera smartphone, tablet ou
aparello de música doméstico”.
No que se refire a
Pioneer, o software en cuestión virá integrado de serie nunha ampla
gama de dispositivos, entre os que se inclúen os novos Receptores AV
de 2013 (do VSX-528 en diante), o Receptor Slim VSX-S510, a liña
completa de altofalantes sen fíos SMA e o recentemente anunciado
Microsistema Slim X-SMC55.
Segundo explican Spotify
e Pioneer, Spotify Connect permite envorcar as listaxe de reprodución
do servizo de streaming nos dispositivos Pioneer de
Home Audio dun xeito simple, sendo o propio trebello doméstico o que
accede ao servizo de Spotify a través da súa conexión a Internet,
xa sexa sen fíos ou a través deles, funcionando o dispositivo móbil
como un controlador do contido, o que supón que a falta de sinal
deixe de ser un atranco para a continuidade do servizo. “Así”,
explícase, “o usuario poderá recibir chamadas,
interactuar con xogos ou ver vídeos dende o seu
dispositivo e sen que a reprodución de música se vexa
interrompida, ao que cómpre engadir que ao non haber
transferencia de datos entre o trebello móbil e o doméstico,
Spotify Connect non remata coa batería do primeiro”.