Os investigadores galegos de Gaia amosan a imaxe en 3D máis exhaustiva da Vía Láctea
xoves, 15 de setembro do 2016
Esta semana
presentáronse
no Campus da Coruña os primeiros froitos achegados pola misión
Gaia, unha iniciativa da Axencia
Espacial Europea (ESA), na que participan investigadoras/es da
nosa terra e da Universitat de Barcelona, e máis de 450 científicos
e enxeñeiros de dúas ducias de países co obxectivo de elaborar un
mapa preciso en 3D da Vía Láctea. Na presentación dos primeiros
resultados de Gaia estiveron integrantes do Laboratorio
Interdisciplinar de Aplicacións de Intelixencia Artificial da
Universidade da Coruña (Minia Manteiga, Carlos Dafonte, Daniel
Garabato e Marco Antonio Álvarez), xunto coa investigadora do
Departamento de Física Aplicada da UVigo, Ana Ulla, e o vicerreitor
de Política Científica da UDC, Salvador Naya. O acto, que se
celebrou de maneira simultánea, serviu entre outras cousas para
presentar a publicación do GDR1, “o primeiro catálogo de Gaia”.
Trátase dun acubillo
de información que repasa e rexistra os traballos despregados ao
longo de tres anos. Neste tempo, recompiláronse 500.000 millóns de
medicións astronómicas e a localización de dous millóns de
estrelas. Todo este coñecemento foi xerado coa axuda de Gaia, a a
sonda espacial que en decembro de 2013 era lanzada alén da Terra co
obxectivo de rexistrar e inventariar as estrelas da Vía Láctea, o
que representa, en palabras dos investigadores, “cartografar mil
millóns de astros da nosa galaxia, ou sexa un 1% das que se estima
existen”.
Segundo fixeron saber,
esta primeira publicación inclúe tamén “os datos fotométricos
de centenares de estrelas variábeis, 2.595 estrelas tipo RR Lyrae e
599 estrelas Cefeidas observadas en xullo de 2014, en que o satélite
escaneou repetidamente os polos galácticos”.
Os devanditos datos
foron o resultado dunha longa observación. De feito, Gaia esculcou
ao longo dos tres anos de misión unha media uns 70 millóns de
obxectos celestes, obtivo máis de 637 millóns de medidas
astrométricas (posicións no ceo) e 150 millóns de medidas
fotométricas (cantidade de luz en cada cor), ao día.
Segundo explicaron os
investigadores galegos na presentación dos primeiros froitos do
proxecto, “os datos crús que obtén o satélite pasan por un
complexo proceso de transformación e análise que leva a cabo un
equipo duns 450 científicos de toda Europa, o consorcio DPAC, do que
o grupo de investigación da Universidade da Coruña forma parte
desde 2007”.
Respecto do que está
por vir, a misión Gaia producirá versións actualizadas do seu
catálogo aproximadamente cada ano a partir desta data, até chegar a
un arquivo final que se publicará arredor do ano 2022. “Os datos
que Gaia proporcionará arroxarán nova luz practicamente en todos os
ámbitos da Astronomía e serán unha referencia durante os vindeiros
50 anos”, engadiron.