Os hostaleiros de Compostela organizan un concurso de microrrelatos a través de Facebook
mércores, 20 de xullo do 2011
O secretario xeral de
Política Lingüística, Anxo Lorenzo, e o director de comunicación e marketing de
Asociación Hostalería Compostela, Aser Álvarez, presentaron
esta mañá as bases dun orixinal concurso de microrrelatos a través das redes
sociais, concretamente de Facebook, que xorde co gallo do oitavo centenario
da catedral de Santiago.
As dúas entidades
promoven esta iniciativa ao abeiro do convenio de colaboración que subscriben
actualmente para promover o fomento da lingua galega a través do sector
hostaleiro. Con este fin, así como co de contribuír á conmemoración dos 800
anos da catedral, ponse en marcha a
través de Facebook o concurso MICROCompH!ostalería.
800 Anos en 800 Carácteres.
Para participar no certame, cómpre unirse ao grupo do
concurso en Facebook. A continuación, bastará con postear o microrrelato, cuxa
temática deberá estar relacionada co 800 aniversario da catedral de Santiago.
Os textos deberán estar redactados en galego e será indispensable que non
superen os 800 carácteres. O prazo de presentación dos relatos remata o día 31
de outubro de 2011.
Os dez microrrelatos máis votados pasarán á fase final do concurso, na que o
xurado designará os tres gañadores e o premio especial para o mellor relato de
temática gastronómica. Os gañadores comunicaranse antes do día 15 de novembro.
Os traballos premiados serán publicados na revista CompHostelería, así como nos medios de comunicación colaboradores
no concurso, que tamén divulgarán os textos máis votados. No certame tamén
colaboran o Consello da Cultura Galega, o Museo da Catedral de Santiago, o Mercado
de Abastos de Santiago, o Concello de Santiago e o Consorcio de Santiago.