Os galegos xa compartimos en BlaBlaCar máis de 62 millóns de quilómetros
venres, 25 de setembro do 2015
A plataforma social líder
de viaxes centrada en usuarios de vehículos compartidos,
BlaBlaCar.es, vén de amosar
as súas cifras de usuarios no ámbito estatal e por Comunidades. No
que se refire ao primeiro eido, o estatal, a plataforma xa conta con
2,5 millóns de membros. Na nosa terra, a cifra é de 125.000. Este
fito galego, sinalan fontes de BlaBlaCar, conseguiuse coincidindo coa
Semana da Mobilidade Sustentábel (que se está a festexar en maior
ou menor medida nas nosas cidades) e coa celebración do seu quinto
ano de actividade na contorna estatal. Ourense e A Coruña, por
certo, son as provincias galegas con máis usuarios. Ademais, os
membros galegos da comunidade compartiron, a longo do dito período,
máis de 62 millóns de quilómetros.
En termos de respecto
polo medio ambiente e tendo en conta que BlaBlaCar axuda a compartir
vehículo e reduce deste xeito o transporte urbano e interurbano, os
usuarios galegos aforramos 4.500 toneladas de emisións de CO2. Por
outra banda, no reconto feito pola comunidade tamén se sinala que a
media de idade dos viaxeiros que tiran partido do servizo medrou até
os 31 anos, e utilízano practicamente por igual homes (58%) e
mulleres (42%).
Para os responsábeis
desta comunidade, está claro -con estes números- que o servizo foi
quen de superar as expectativas iniciais, para algunhas voces
críticas ben poucas, e fíxoo sobre todo nos últimos anos da súa
andaina, nos que o crecemento en cantidade de usuarios foi
exponencial. Jaime Rodríguez de Santiago, responsábel de BlaBlaCar
España, asegura que “datos coma os devanditos demostran que
BlaBlaCar e o consumo colaborativo non son unha moda, senón que
forman parte dun cambio de mentalidade que acepta de maneira natural
a coexistencia de distintas formas de viaxar e dun cambio de
actitude”.
En Galicia, como dixemos,
as provincias con maior número de usuarios de BlaBlaCar rexistrados
son Ourense e A Coruña, con cifras semellantes, seguidas de Lugo e
Pontevedra. Dentro de cada provincia, hai usuarios en case todas as
localidades e isto, sinalan dende o servizo en liña, “débese a
que moitos dos traxectos realizados unen puntos da Comunidade que só
poden realizarse de maneira directa en coche”. Así, os 10
traxectos máis cotiáns concertados a través de BlaBlaCar só
supoñen un 3% das viaxes que se publican na plataforma. Polo tanto,
sinalan, “non é raro atopar viaxes na plataforma entre Lalín e
Madrid, Chantada e Pontevedra ou A Coruña e Cáceres”.
No estudo tamén se di
que o 71% dos usuarios de BlaBlaCar ten traballo, o 13% son
estudantes e o 3% deles están xubilados. Ademais, saliéntase que o
13% deles está no paro, unha situación para a que BlaBlaCar supuxo
“un alivio á hora de exporse a viaxar polo aforro que supón”.
Con todo, engádese, o aforro é só un dos motivos polos que os
usuarios deciden compartir coche. Outros deles son, no caso dos
condutores, non viaxaren sós e compartiren unha experiencia, amais
de romper unha lanza a prol da eficiencia enerxética e a loita
contra o cambio climático. Así, só en Galicia, nos últimos 12
meses, os usuarios de BlaBlaCar aforraron 4.500 toneladas de emisións
de CO2. Este aforro equivale ao CO2 emitido por un vehículo
motorizado que dá 450 veces a volta ao mundo ou o de 2.000 viaxes de
ida e volta desde Madrid a Nova York.