Os enxeñeiros en Informática distinguen a orixinalidade e o potencial de emprendemento dos encontros LaconNetwork
xoves, 25 de outubro do 2012
O
Colexio Profesional de Enxeñaría en Informática de Galicia, CPEIG,
segue a desvelar as entidades, profesionais e iniciativas que vai
recoñecer (polo seu labor de difusión, innovación e compromiso
TIC, principalmente) no marco da súa Noite da Enxeñaría en
Informática de Galicia, que se vai celebrar o vindeiro 23 de
novembro en Santiago (Hostal dos Reis Católicos). Este xoves 25 de
outubro, sen ir máis lonxe, os enxeñeiros informan da concesión do
Premio Iniciativa Emprendedora
a LaconNetwork, evento de networking
que reúne a emprendedores do sector TIC de Galicia “baixo
un paraugas informal pero moi estable”.
O
xurado valorou o xeito “alternativo” de apoio ao
emprendemento de LaconNetwork, un encontro que se concreta nun xantar
o último venres de cada mes e no que os emprendedores TIC de Galicia
poden compartir experiencias e valoracións dun xeito distendido e
periódico. Asemade, as xuntanzas inclúen a presenza de figuras
representativas do sector e de entidades que poden estar interesadas
nos proxectos que se están a desenvolver na nosa Comunidade. O xeito de concretar a hora e o lugar de encontro para a
comida é mediante a rede social Twitter.
Os
encontros de LaconNetwork fixeron xa dous anos de vida, ao longo dos
que pasaron máis de 200 emprendedores e máis de 100 proxectos que,
de xeito recorrente, participan nas xuntanzas. O último LaconNetwork
2 years superou as expectativas de todos co apoio dos laconeiros.
Nesa ocasión cruzou fronteiras e contou co apoio de expertos e
emprendedores nacionais e internacionais, cun total de máis de 300
asistentes inscritos na Rede LaconNetwork de anteriores edicións e
700 participantes do evento por Streaming.
O
CPEIG fará entrega dos seus premios anuais no transcurso da Noite
da Exeñaría en Informática de Galicia, que este ano chega á
súa cuarta edición. Será o 23 de novembro, nunha gala que
representa un punto de encontro para os colexiados e colexiadas, e
que conta coa participación de cargos empresariais do sector TIC e
institucionais.