Os enxeñeiros de Telecomunicación constatan a calidade do servizo dos operadores do Plan de Banda Larga
luns, 2 de xuño do 2014
O Colexio Colexio
Enxeñeiros de Telecomunicación de Galicia (COETG) vén de levar a
cabo un estudo exhaustivo sobre o servizo que achegan os operadores
que desenvolven o seu labor ao abeiro do Plan de Banda Larga das
Xunta. A investigación incluíu un seguimento e un control
pormenorizado da calidade do dito servizo nun total de 511 núcleos
de poboación. O obxectivo era verificar que os operadores están a
cumprir cos niveis de cobertura, velocidade e dispoñibilidade
requiridos nas bases de axudas incluídas no dito Plan. A
auditoría dos enxeñeiros do COETG, segundo sinala AMTEGA, confirmou
o cumprimento do devandito.
O seguimento, recollido
nun convenio asinado en 2013 entre Axencia para a Modernización
Tecnolóxica de Galicia (AMTEGA) e o COETG, levouse a cabo nas áreas
que están a contar con redes fixas e tamén redes sen fíos. No que
se refire ás primeiras, o colexio avaliou as novas conexións de
banda larga en “enderezos representativos desta acción do Plan”.
Escolléronse 37 centros de servizos públicos que dispuxeron de nova
conexión ADSL distribuídos xeograficamente ao longo do territorio
galego.
Finalmente, segundo
informa AMTEGA, “os resultados do seguimento realizado nestes 37
centros confirmaron o cumprimento dos niveis de calidade
establecidos”. Respecto ás redes sen fíos, elixiuse unha mostra
de 474 núcleos repartidos nas catro provincias. O resultado final
das comprobacións confirmou que no 91,56% dos casos cúmprese cos
valores obxectivo de calidade previamente fixados, explica a axencia.
No que atinxe aos casos que restan, esa taxa do 8,4% que poderiamos
cualificar de materia pendente, o informe conclúe que é
recomendábel realizar melloras de cobertura. Melloras que segundo
explica da axencia que dirixe Mar Pereira, xa se están a levar a
cabo.