Os enxeñeiros de Telecomunicación unen forzas con Red.es para impulsar as novas canles e servizos do coñecemento
luns, 21 de xaneiro do 2013
O
COIT, Colexio Oficial de Enxeñeiros de Telecomunicación,
anunciou a semana pasada que vai colaborar arreo con Red.es para
impulsar as telecomunicacións e a Sociedade da Información en
España. Este achegamento entre as entidades formalizouse a
través dun convenio de colaboración establecido entre o COIT e o
Observatorio Nacional de Telecomunicacións e Sociedade da
Información (ONTSI). Con este acordo, entre outras cousas, dáse vía
libre para a realización de actividades de formación e divulgación,
e tamén para a elaboración de informes e publicacións técnicas de
análises do sector e dos seus máis importantes indicadores.
Entre
os obxectivos que se procuran está o de promover e reforzar o papel
dos ditos enxeñeiros como co-responsábeis do pulo á Sociedade do
Coñecemento no Estado. Neste senso, búscase a inserción laboral e
o impulso do emprendemento.
Segundo
fixo saber o COIT, este colexio “está en disposición de apoiar
a Red.es na súa estratexia de potenciación da administración
electrónica como consecuencia da Axenda Dixital Española e pon á
súa disposición o valor engadido que atesouramos como entidade
acreditada por ENAC e a experiencia en tramitación electrónica de
expedientes para a posta en marcha dos retos que o novo marco
lexislativo sectorial vai expor”.
Lembrar
que o Colexio Oficial de Enxeñeiros de Telecomunicación (COIT) é
unha corporación de dereito público de ámbito estatal que ten como
fins fundamentais, delegados pola administración, a ordenación do
exercicio da profesión de Enxeñeiro de Telecomunicación, a
representación exclusiva da mesma e a defensa dos intereses
profesionais dos colexiados, así como impulsar ao progreso e
disposición das técnicas propias da profesión.