Os creadores de Tranxfer advirten dunha importante proliferación do cibercrime
luns, 2 de decembro do 2013
Coincidindo co Día
Mundial da Seguridade da Información (o pasado sábado 30) deuse a
coñecer novamente a plataforma Tranxfer,
un servizo encamiñado a solucionar boa parte dos problemas que se
derivan do manexo dun gran volume de datos na Rede e nas contornas
empresariais. Esta plataforma, de raizame catalá (vén da man dos
profesionais de ISIS, con sede en Barcelona), foi lanzada o pasado
verán co obxectivo de facerlle a competencia a Dropbox,
presentándose como “o primeiro sistema que permite enviar
ficheiros grandes e confidenciais de forma cómoda e segura, sen
necesidade de descargar ningún tipo de software”.
Os seus creadores, Miquel
Planas, Ángel Márquez e Pedro Fontana, advertiron con motivo da
dita celebración mundial (este sábado) que hoxe en día existen
grandes riscos que nos axexan cada vez que enviamos un mail con
información adxunta: fotos, ficheiros, bases de datos, informes,
documentos que son interceptados, perdidos ou roubados a través do
que se coñece como cibercrime. “De feito”, sinalaron, “estímase
que só 1 de cada 3 empresas detecta un ataque informático”. E
engaden: “Calcúlase que recibimos unha media de 3.500 mails con
ficheiros adxuntos ao ano e que as empresas reciben máis de 100.000
páxinas contaminadas, esta cifra pode converterse nunha actividade
de alto risco se tratamos con información confidencial protexida
propia de sectores que xeran unha gran cantidade de información”.
Volvendo a Tranxfer, a
ferramenta que aproveitaron para presentar no Día Mundial da
Seguridade da Información, sinalan que outra das grandes
particularidades do servizo reside en que “a diferenza doutros
sistemas, a nosa ferramenta permite a compartición de arquivos tanto
da propia empresa como con firmas externas (socios, clientes,
provedores, etc.), e controla e elimina o risco de fuga de
información entre as mesmas”. Neste senso, Tranxfer, sería quen
de controlar o ciclo de vida do intercambio de arquivos, “reducindo
ao mínimo os buracos de seguridade propios de contornas empresariais
con políticas de confidencialidade reguladas”, explican.