Os creadores de Malviviendo chegan ao Carballo Interplay para facer unha webserie colectiva
mércores, 27 de abril do 2016
- Os creadores de Malviviendo na edición anterior do Carballo Interplay e entrevistados por Uncut
Xa vai quedando pouco
para o arrinque da terceira edición do festival
de contidos dixitais Carballo Interplay, e para ir animando a
espera a organización (o Concello) impulsa un obradoiro que ten por
obxectivo dar forma a unha webserie. “A nosa intención”,
sinalan os impulsores do certame, é “quecer motores da mellor
maneira posíbel, creando”. Os encargados de impartir este
obradoiro e levar da man aos participantes para materializar a
devandita serie en liña son David Saínz e Teresa Segura, creadores
de Malviviendo. O curso
rematará no Carballo Inteplay coa proxección do resultado da
actividade. Como lembraremos, o festival en si mesmo celebrase na
vila bergantiñá os vindeiros 5, 6 e 7 de maio.
- Unha captura do obradoiro que se está a desenvolver estes días
David Saínz e Teresa
Segura son, como dixemos, os responsábeis de Malviviendo,
unha das pioneiras e das máis populares webseries españolas.
Dende este martes 26 de abril e até o vindeiro domingo, día 1 de
maio, estes dous artistas sevillanos compartirán nun curso
teórico-práctico os seus coñecementos e experiencia na posta en
marcha dun proxecto de ficción seriada para a Rede, dende a creación
do guión ata a súa distribución. O obradoiro, informa a
organización, ten unha parte teórica importante, pero no seu miolo
está formulado como “un exercicio práctico no que os alumnos
actuarán como unha equipa e crearán un proxecto conxunto”. A
webserie resultante poderá verse o primeiro día do Carballo
Interplay, o xoves 5 de maio, ás 12h30 no auditorio do Forum de
Carballo.