Os consumidores fan un chamamento para reclamar a Apple os cobros por reparacións en prazo de garantía legal
venres, 12 de xullo do 2013
A Asociación Xeral de
Consumidores (ASGECO
Confederación) e FACUA
emitiron os días pasados un comunicado no que animan á comunidade
en liña a reclamar a Apple “por pagos efectuados en período de
garantía legal”, sinálase. Este chamamento vén dado tras
coñecerse a decisión da Comunidade de Madrid de sancionar ao
xigante de trebellos tecnolóxicos cun importe de 47.000 euros a raíz
dunha denuncia iniciada por ASGECO por térense detectado as
devanditas prácticas fraudulentas. Para a plataforma, dado o
reducido da multa (en comparación con outras sancións impostas a
Apple no estranxeiro polas mesmas razóns), é preciso pechar
fileiras entre os consumidores e seguir reclamando á multinacional
os pagos fraudulentos (pagos por reparacións feitos durante o prazo
de garantía de dous anos asegurada pola empresa). A asociación
opina tamén que os ditos 47.000 euros non repercutirán en nada nos
consumidores.
Como lembraremos, ASGECO
denunciou a Apple ante a Fiscalía Xeral do Estado por estar a
incumprir a Lei Xeral para a Defensa dos Consumidores e Usuarios ao
ofrecer tan só un ano de garantía para todos os produtos adquiridos
en apple.com/es. Ante o
silencio por parte deste organismo presentou de novo a denuncia ante
o Instituto Nacional de Consumo, quen a derivou por fin á Dirección
Xeral de Consumo da Comunidade de Madrid. Malia a sanción dada a
coñecer po esta última administración, “ASGECO denuncia a
total indefensión dos consumidores antes tales prácticas así como
a lentitude e o pouco interese das administracións competentes en
impor as garantías da Lei Xeral para a Defensa dos Consumidores e
Usuarios, e a multar de maneira exemplar aos que a
incumpren, que sexan sociedades españolas ou grupos internacionais”.