Os centros penitenciarios e as entidades sociais adéstranse en reciclaxe de RAEE
mércores, 28 de novembro do 2018
Facer
fronte á problemática dos refugallos eléctricos e electrónicos e
pór en práctica metodoloxías que contribúan ás súas segundas e
terceiras vidas. E facelo tamén con vontade social. Este é o gran
obxectivo dunha iniciativa impulsada pola Consellería de Medio
Ambiente: obradoiros formativos sobre reutilización de material RAEE
(Residuos de Aparellos Eléctricos e Electrónicos) aos que están
convidados os centros penitenciarios e as entidades sociais. A
primeira actividade desta índole celebrouse onte nas instalacións
do CRD Medelo de Silleda, onde 14 usuarios dos centro recibiron
información sobre a axeitada xestión deste tipo de residuos.
A
Consellería informou que até decembro celebraranse un total de nove
talleres en cinco entidades sociais dedicadas á persoas con
diversidades funcionais ou cognitivas e catro centros penitenciarios,
onde se celebrarán estas actividades baixo a denominación Os
residuos como oportunidade RAAE.
O
inicio do taller no CRD Medelo terá continuidade co taller no centro
ASPANANE (29/11/2018), o da Asociación A Xanela (30/11/2018), no CRD
Mos (10/12/2018) e en ASPRONAGA (11/12/2018). Asemade, no mes de
decembro, celebraranse os talleres nos centros penitenciarios de
Monterroso, Teixeiro, Pereiro e A Lama.
En
palabras de Medio Ambiente, estas accións teñen “unha clara
vertente ambiental”, para a redución de residuos, e nelas
explicarase a importancia da prevención, a correcta xestión dos
refugallos unha vez xerados, así como o impacto ambiental asociado,
tanto na produción deste aparellos, como cando pasan a ser residuos
(RAEE). O dito obxectivo compleméntase cunha vontade socio-laboral,
achegando orientacións básicas cara a unha saída profesional para
colectivos en risco de exclusión.
Medio
Ambiente lembra que actualmente, en Galicia xéranse un total de
54.000 toneladas ao ano deste tipo de material, o que supón unha
media de 20 quilos de residuos por persoa. Amais, boa parte dos
mesmos poderían regresar ao ciclo produtivo aplicando un programa de
preparación para segundas vidas que contemple a súa comprobación,
limpeza e reparación, de xeito que se permita a reutilización
destes elementos sen ningunha outra transformación previa.