Os Premios Torrente Ballester reforzan programa cultural, xurado e presenza nas redes
mércores, 26 de maio do 2021
Os
Premios
Torrente Ballester, sobranceiros e prestixiosos galardóns literarios
impulsados pola Deputación da Coruña, recibiron este mes de maio un
importante impulso da entidade provincial para ampliar
ramificacións, pegada e repercusión. Amais de incluír unha
programación cultural propia e de recibir a incorporación do
escritor Ignacio Martínez de Pisón (que formará parte do xurado
deste ano e visitará A Coruña no mes de xuño para celebrar os 30
anos do premio Torrente que gañou coa novela Nuevo plano de la
ciudad secreta), o certame incrementou a súa presenza nas redes
sociais. O prazo para presentar obras orixinais ao premio en galego e
castelán ficará aberto até o 15 de xuño.
O
programa de actividades dos Premios Torrente Ballester estará
coordinado por Susana Pedreira, o castelán, e Ramón Rozas, o
galego.
O
Torrente Ballester é o premio máis veterano dos que organiza a
Deputación da Coruña e nas 32 edicións anteriores (convocadas de
xeito ininterrompido desde o ano 1989) presentáronse máis de 12.500
obras orixinais remitidas desde Galicia, o resto do Estado e
Latinoamérica.
Este
ano, os xurados do Premio en galego e castelán reuniranse no Pazo de
Mariñán e as obras gañadoras coñeceranse o día 10 de decembro.
“Animamos
a todas as escritoras e escritores que teñan unha historia a que se
presenten ao Torrente, un dos premios literarios con máis tradición
e prestixio do país, cun premio económico moi importante de 12.000
euros para cada obra gañadora” , sinalou o deputado de Cultura,
Xurxo Couto.
O
Premio Torrente en Instagram
Ademais,
este ano o Premio Torrente estará presente entre as comunidades
lectoras de dous bookstagramers galegos, que suman máis de
50.000 seareiras e seareiros en Instagram: Xacobe Pato e Lorena
Bembibre. “A través das súas contas difundirán todas as
novidades do premio, as actividades que a Deputación programará
entre xuño e decembro, sorteos para participar en encontros con
autores e conversas literarias que anunciaremos nas vindeiras
semanas”, adiantou Couto na presentación destas novidades
celebrada este 25 de maio.
A
Deputación da Coruña quere reforzar desta maneira a convocatoria do
Torrente “co obxectivo de ir tecendo unha rede de espazos lectores
que se formalizará en 2022 e co obxectivo de mostrar as obras
gañadoras de todos os premios literarios que anualmente convoca a
área de Cultura”.