Os Premios InLugo superan as previsións en número de candidatos
mércores, 4 de xuño do 2014
O congreso InLugo semella ser un dos grandes eventos
da tempada. Isto reflíctese non só no interese amosado polos
internautas como asistentes potenciais, que os días pasados foron
testemuñas dunha máis que estreita marxe de tempo para
inscribírense (as prazas dispoñíbeis esgotáronse nunha hora e a
organización, a Deputación de Lugo, anunciou
que habilitará o salón de plenos para seguir as xornadas).
Tamén se reflicte na
alta cifra de candidatos aos Premios InLugo, que onte mesmo, a 24
horas para o peche de prazo de achegas, xa amosaba recórd de
cifras: até medio cento de iniciativas e proxectos lucenses
presentados.
O seu obxectivo será facerse con algúns dos
galardóns que recoñecen o bo uso de Internet e das novas
tecnoloxías en diferentes ámbitos. Estes premios, nacidos ao abeiro
de Congreso de Cultura Dixital e Redes Sociais #InLugo, distinguen
tamén “o axeitado emprego das redes sociais”. Por certo que a
Deputación de Lugo lembraba onte que a cifra de candidatos podería
superar finalmente, con moito, o medio cento de achegas. De feito, o
prazo fica aberto até as 20.00 horas deste mércores 4 de xuño.
Para participar unicamente é preciso cubrir o
formulario dispoñíbel na
web do encontro cos datos correspondentes ó noso nome, teléfono
de contacto e correo electrónico. Tamén é posíbel engadir toda a
documentación que consideremos relevante para que o xurado avalíe
os méritos da nosa candidatura. As catro categorías do certame son
as seguintes: Comercio, Lecer e Restauración; Educación e
Formación; Cultura e Social; e Tecnoloxía.
Unha vez
finalizado o prazo de presentación de candidaturas, un xurado
formado por membros da Deputación valorará as mesmas e elixirá ós
gañadores en cada unha das categorías existentes. Os galardoados
recibirán o seu premio o venres, 7 de xuño, no transcurso do
congreso. Este consistirá nunha figura-galardón e un iPad mini de
última xeración cedidos, de xeito totalmente gratuíto, pola
compañía Telefónica.