Os Piratas galegos, cataláns e madrileños impulsan un portal P2P para a descarga de libros de texto
martes, 18 de setembro do 2012
Os libros soben de prezo, as familias teñen
menos recursos e o IVE de produtos de uso común (como os cueiros, por exemplo)
dispárase. Conclusión: quen máis quen menos xa está contra as cordas. Para
botar unha man, os Piratas de Galicia, unidos aos seus correlixionarios de Madrid
e Catalunya veñen de abrir un portal de descargas de libros de
texto e outros materiais pedagóxicos. A iniciativa diríxese a pór de relevo
un dato ben preocupante e a sensibilizar sobre a importancia de combatelo: un
de cada tres escolares, este curso, non terá tódolos libros que se lles esixen.
Polo de agora, o portal aínda está dando os primeiros pasos, e non hai moita
cousa dispoñíbel na nosa lingua, pero a intención é ir enriquecéndoo con paso
firme e sen pausa.
A web é, en si mesma, unha defenda do acceso á
cultura e ao coñecemento sobre calquera outra consideración, xa que dende os
Piratas, sexan do país que sexan, consideran que é “un requirimento indispensábel en calquera estado democrático”. A
proposta ten metodoloxía de portal con ligazóns P2P, artellándose todo en base
ás seguintes canles de acceso: material de primaria, secundaria e bacharelato.
O proxecto Parents 2 Parents (así se
fai chamar) foi unha realidade grazas á colaboración de Piratas de Holanda, República
Checa e Serbia. O feito de que se basee en tecnoloxía Peer to Peer (o mesmo no que se basean eMule ou BitTorrent),
permite, a través de portas abertas en cada computador, a compartición de
arquivos entre persoas. Grazas a iso, din os Piratas, “o eventual bloqueo da páxina web por parte das autoridades, non poderá
deter o acceso aos materiais”. O portal está aberto á participación, sendo
como é o seu obxectivo a mellora da educación: unha arela colectiva. Así,
calquera pode darse de alta na páxina e completala cos recursos que atope
dispoñíbeis na Rede ou de creación de seu.