Os Demo Days TFE da ESEI de Ourense xunta esta semana emprendedores e investidores
martes, 29 de novembro do 2022
A
Escola Superior de Enxeñaría Informática do Campus de Ourense
acolle esta semana (martes e mércores pola tarde, os días 29 e 30
de novembro), os Demo
Days TFE, unha iniciativa encadrada dentro das actividades do
proxecto transfronteirizo NOVA TFE (Novas Oportunidades de Negocio
para Pemes Baseadas en Tecnoloxías Facilitadoras). O obxectivo desta
actividade, aberta ás persoas interesadas, é “establecer
sinerxías e contacto entre persoas emprendedoras e posíbeis
investidores para impulsar ou relanzar proxectos empresariais”,
explican os responsábeis do proxecto. Engadindo que estamos ante “un
evento co cal impulsar ou acelerar un proxecto empresarial”.
Na
xuntanza, as
e os emprendedores levan a cabo unha presentación das súas
propostas e iniciativas ou dos avances do seus proxectos ante un
público de interese para eles en diferentes ámbitos. Así, nos
dous días de programación van participar empresas de distintos
ámbitos como a aeronáutica, arqueoloxía ou impresións 3D, para
expor a súa experiencia e as súas propostas ante aqueles
interesados nas mesmas, como poden ser posíbeis investidores, socios
estratéxicos ou clientes, así como estudantes ou público en xeral.
Participarán
empresas como Enercraft (empresa galega galardoada en 2021 como o
mellor proxecto emprendedor durante os VIII Premios Galicia de
Enerxía); Rediot (proxecto que ofrece solucións tecnolóxicas a
medida relacionadas cos ámbitos das Cidades Intelixentes e a
Internet das Cousas); Xesta Brava (iniciativa de propostas
divulgativas innovadoras dirixidas á comunidade educativa e á
sociedade); Bágoas Fóra (espazo virtual onde se une o tradicional
da artesanía coa innovación educativa); F&H Asociados (empresa
de arqueoloxía, consultaría e impacto ambiental) e MASQUE3D
(empresa que traballa na divulgación da fabricación aditiva e
impresión 3D).
NOVA
TFE é un proxecto de cooperación transfronteiriza do Programa
Interreg V A España-Portugal (POCTEP) 2014-2020 que conta con
financiamento FEDER, fondos europeos de desenvolvemento rexional. Nel
participa un equipo multidisciplinar da Universidade de Vigo formado
por investigadoras e investigadores da Escola Superior de Enxeñaría
Informática, das facultades de Dereito e Ciencias Empresariais e
Turismo e da Escola de Enxeñaría Industrial. Ademais da institución
académica, son socios do proxecto a Mancomunidade de O Salnés
(líder da iniciativa), a Deputación de Ourense, a Dirección Xeral
de Administración Local da Xunta de Galicia e a Câmara Municipal de
Valença (Portugal). O obxectivo principal deste proxecto é
potenciar a investigación, o desenvolvemento tecnolóxico e a
innovación, mellorando a participación do tecido empresarial nos
procesos de innovación nas actividades de I+D+I máis achegadas ao
mercado. A iniciativa quere facilitar que a investigación aplicada
relacionada coa Internet das Cousas (especialmente Cidades
Intelixentes) e a fabricación avanzada sexan trasladadas ás
pequenas e medianas empresas (menos urbanas) dos sectores máis
relevantes do espazo transfronteirizo, involucrando directamente ao
seu persoal en redes de intercambio e nos laboratorios de
experimentación e prototipado.