Os 11 centros de coworking da Xunta e a EOI permitiron consolidar 400 empresas
martes, 19 de abril do 2022
Este
19 de abril o
espazo de traballo colaborativo e innovador que se celebra no CIS
Tecnoloxía e Deseño de Ferrol recibiu a visita do conselleiro de
Economía, Francisco Conde, que puido comprobar de primeira man o
traballo desenvolvido polas persoas participantes no Coworking de
Ferrolterra, un dos que se celebra de xeito ininterrompido dende a
primeira edición, e que permitiu xa a posta en marcha de 52
proxectos empresariais na comarca e a xeración de case 90 empregos.
Na
súa visita, Conde salientou o traballo conxunto do seu departamento
coa Escola de Organización Industrial (EOI) para afianzar os
alicerces de novos centros de emprendemento colaborativo coma o de
Ferrol.
Conde,
que estivo acompañado pola delegada territorial da Xunta en Ferrol,
Martina Aneiros, explicou que esta rede de apoio ao emprendemento
celebra este ano a súa sexta convocatoria “co dobre de espazos cos
que botou a andar en 2016”. De feito, dixo, o de Ferrolterra é un
dos 11 novos coworking que este ano están activos por toda
Galicia ao abeiro do dito marco de traballo coa EOI.
O
vicepresidente económico, que departiu cos participantes nesta
iniciativa, apuntou que máis da metade dos proxectos que pasaron
polas diferentes edicións dos espazos coworking xa están
consolidados como empresas: en concreto, 384 que, á súa vez,
permitiron a creación de 624 postos de traballo. Ademais, sinalou
que máis da metade das persoas participantes, 489, foron mulleres.