O xornal dixital CompostelaDiario fai reconto dos seus tres meses de vida
xoves, 29 de decembro do 2011
Para quen non o saiba, esta recta final de ano
deparounos a aparición e/ou afianzamento progresivo de varios medios galegos
novos, todos eles con forte presenza dixital, é o caso de Sermos Galiza, Prazapública.com ou un do que aínda non
falaramos en Código Cero: CompostelaDiario.
Sobre este último, dicir que se trata dunha canle centrada en Santiago que xa
ten tras de si tres mes de andaina e que devagar pero con firmeza vaise
asentando entre os medios en liña máis consultados na capital galega e alén
dela: da media de 26 visitas acadadas nos seus comezos o pasado mes de outubro
foi quen de situarse nas 50 ao mes seguinte e, hoxe en día, en máis de 100.
Asemade, superou a liña dos 1.500 visitantes
diferentes, o que supón, en palabras dos responsábeis
da páxina, “un dato moi importante,
xa que significa que a nosa información é de interese para un grande abano de
xente, e que é difundida correctamente”. Este interese da comunidade
internauta polo novo medio ten aínda máis valor ao terse dado en intres de
inactividade. Así no explican dende CompostelaDiario: “A estabilidade de visitas nos días nos que non foi posíbel actualizar a
información nin promovela, confírmanos que conseguimos un público afianzado que
vai buscar no xornal a actualidade do día por mero interese propio”.
O xornal dixital, que ten unha media de 5
actualizacións diarias, proseguirá ao longo desta festas “a pleno rendemento”, sen paróns á vista malia a focha informativa
que toda festividade prolongada, é o caso do Nadal, implica.